Nice inkhel entu awm dawn lo

French Ligue 1 club Nice chuan an fan-te buaina siam vangin an tuar dawn. Pathianni zana Bordeaux an mikhual hunah a hmuna entu an awm thei dawn lo, hri leng vang ni lo hrem vanga entu awm lo hi a hrehawm ang.

Kar hmasa khan Nice hian Marseille an mikhual a, corner pet tura kal Dimitri Payet chu fans lamin tui bottle hmangin an lo vawm - Payet hian dawh mai loin fans lam a vawm let a, buaina chhuak zuiin inkhel pawh an zo thei lo.

Darkar khat chuang an buai hnuah Nice hian inkhelh chhunzawm tumin khelmual an lut, 1-0 in hma an hruai mek bawk. Mahse, Marseille lam chuan a him tawk loa ngaiin an khel zui duh tawh lo a ni.

Ligue de Football Professionnel (LFP) chuan thil thleng hi a zirchiang mek a, tun thleng chuan chak leh chak lo zawka puan an la nei lo, an kal zel dan turah thu an la ti tlu lo bawk.