Dortmund tan insiamṭhat a ṭul

Marco Rose-a hnuaiah Borussia Dortmund-in bul an ṭan pangngai viaua a lan hnuah DFL Supercup-ah Bayern Munich an hneh lo a, kar liam ta khan league match-ah SC Freiburg an hneh lo leh bawk.

Dortmund hian zanin dar 12:00 hian Signal Iduna Park-ah Hoffenheim an mikhual dawn a, point thum hmuh a awlsam dawn lo. Dortmund hian player beiseiawm tak tak kawl khawm mah se goal venhim lamah harsatna an tawk.

League match hmasa berah Eintracht Frankfurt 5-2 in sawp mah se goal hnih an chhuah a, Supercup-ah Bayern an hneh loh ṭumin goal thum an chhuah a, Freiburg lakah goal hnih bawk an chhuah.

Freiburg 2-1 a an hneh loh ṭum hian veteran defender Mats Hummels chu bench aṭangin a rawn lut a, Germany international hi Hoffenheim lakah hian bul ṭan tawh tura ngaih a ni. Dortmund hian goal an venhim theih chuan tlarhma lamah Erling Haaland an kawl miau avangin goal an khung ngei a rinawm.