Monaco beiseina a thamral ta

Wissam Ben Yedder-a'n goal hnih khung mah se Champions League khel turin AS Monaco a kaipui zo lo a, playoff aṭangin Ukrainian club Shakhtar Donetsk chuan an pet chhuak.

Monaco hian first leg-ah 1-0 in hnehna an lo chang zo lo tawh a, second leg-ah 2-2 a an inhnehtawk avangin inkhel pahnih belhkhawmah 3-2 in an tlawm.

Sheriff Tiraspol chu Moldovan club zinga Champions League group stage khel tura tling hmasa ber an ni bawk a, first leg-a 3-0 a an lo hneh tawh Dinamo Zagreb nen 0-0 a inhnehtawkin an tlang.

RB Salzburg chuan 2-1 in Brondby an hneh a, inkhel hmasa nena belhkhawmin 4-2 in an tlang - Shakhtar, Monaco leh Dinamo hma hian BSC Young Boys, Malmo leh Benfica chuan playoff paltlangin Champions League an lo inpetkai tawh bawk.

Tlangval vanduai
Ben Yedder-a'n Champions League khel turin a team tan hnathawh tur a nei tih a hria a, Shakhtar khelmualah minute 39 chungin goal hnih a khung - French club hian hei hi venghim thei se inkhel hmasa nen belhkhawma 2-1 a tlang mai tur an ni.

Mahse, Monaco an ṭang zo lo. Ukrainian club tana bench aṭanga luhtir Marlos chuan minute 74-naah si phurh a rawn sut ṭhen a, hun tawp thlenga goal dang a luh loh avangin extra time khelh a ni.

Season hmasa ang chu ni se Monaco hi khualmuala goal khung tam zawk avanga tlang mai tur an ni a, mahse, UEFA lamin dan thar hmangin away goal rule a tibo tawh. Shakhtar-in dan thar chu vanneih nan an hmang zui a, Monaco defender Ruben Aguilar chuan minute 114-naah an lamah a tilut a, goal dang lut loin Monaco an tlawm.

Ben Yedder-a'n hattrick siamna remchang vawi hnih ngawt a neih a hlah kha a ui khawp ang. Shakhtar goalkeeper Andriy Pyatov-a'n Kevin Volland khung tur nia lang a dan pawh a pui takzet.

Hmel thar Sheriff
Champions League-in kum danga a la hmuh ngai loh club tun season inelnaah a hmu dawn a, an hming chu Sheriff Tiraspol an ni.

Moldovan club hian Dinamo khelmualah minute 90 chhungin goal an chhuah lo a, first leg-ah 3-0 a an lo chak tawh avangin an tlang - Sheriff hian Champions League first qualifying round aṭangin inelna hi an hmachhawn a, group stage an inpetkai thei!

RB Salzburg-in minute 10 chhungin goal hnih an khung a, Benjamin Sesko leh Brenden Aaronson ten Austrian club tan khungin Brondby an che hman lo.

Danish club tan hian defender Andreas Maxsoe chuan minute 62-naah si phurh rawn sut ṭhen ve bawk mah se a team a chhanhim zo lo a, first leg-ah 2-1 thoa an lo tlawm tawh avangin an tla.