Ramsey ko mah se khel thei dawn lo

Wales chuan September thlaa World Cup qualifier khel tur squad an puang a, captain Gareth Bale leh Aaron Ramsey hming a lang. Ramsey erawh hliam vangin a inlan thei dawn lo.

Serie A match hmasa berah Juventus leh Udinese 2-2 in an inhnehtawk a, he inkhelah hian Ramsey chu minute 59-naah a malpui dinglam hliam vanga lak chhuah a ni a, club leh ram tan a khel thei dawn rih lo a ni.

Arsenal aṭanga Old Lady a pan hnuah Ramsey hi hliam vangin a buai nasa hle. Bianconeri tan hian inelna hrang hrangah match 66 chauh la khelin goal ruk a khung tawh, kum 30 mi a nih tawh avangin a vanglai a liam mek.

Juve chuan thuchhuah siamin, "Udinese nen kan inkhelh ṭuma hliam Aaron Ramsey chu endik a ni a, a malpui vei lam a na. Ni 10 hnuah endik nawn leh a ni ang," an ti. Tun kar tawpa Empoli an khelh tur aṭangin a inlan thei lo ṭan ang.

Ramsey awmna ram Wales hian September 5-ah Belarus an tlawh dawn a, chumi hnuah Estonia an mikhual zui ve leh bawk dawn a ni.

Wales squad:
Goalkeepers: Hennessey, Ward, A Davies.
Defenders: B Davies, Gunter, Rodon, Ampadu, N Williams, Lockyer, Lawrence, Norrington-Davies.
Midfielders: Ramsey, Allen, J Williams, Wilson, Brooks, Morrell, Smith, Levitt, Thomas, Colwill.
Forwards: Bale, James, Moore, T Roberts, Johnson.