Siamtharna chang Liverpool khelmualah Chelsea

Premier League season ṭan dawna champion tur rinkai zingah Chelsea leh Liverpool hming lam tel zel a ni a, season ṭan hnuah mipui rinna an tithlawn lo.

English club lian pahnih hian match hnih an khelh tawhah hnehna an chang ve ve a, goal nga ve ve khungin an lamah goal chhuah an la nei lo bawk - bul ṭan dan duhthusam a ni.

Mahse, zanin dar 10:00-ah team pahnih zinga a tu emaw zawk hi chuan kut bengin an match thumna an mangṭha mai thei - Anfield-ah Chelsea an lenglut dawn a, inkhel a hmuhnawm loh ring suh.

Khelmualah fans an kir leh theih tak avangin inkhel boruakin ngai a awh leh ta bawk a, Anfield boruak pawh a danglam leh tawh - inkhel boruak a sang ang.

Chelsea an ṭha
Thomas Tuchel an neih hnuah Chelsea an danglam a, chumi hrilhfiahtu chu nomawi leh award a ni - Champions League-ah an champion a, UEFA Super Cup-ah nomawi an chawi leh tawh bawk.

Ningani zana UEFA award sem zanah Best Coach, Best Player, Best Goalkeeper leh Best Midfielder thlengin Chelsea-in an dawng a, hei hian he team ṭhat tawkzia a hrilhfiah.

Blues tan midfield-ah N’Golo Kante leh Jorginho an inkawp thei tura ngaih a ni a, Ben Chilwell pawh bul ṭan tawh tura ngaih a ni. Mual ding lamah Reece James a awm thei ang.

Tlarhmaah Romelu Lukaku a awm tak avangin Chelsea tlarhma an hlauhawm dawn tih a chiang a, Belgian striker thlawp turin Mason Mount leh Kai Havertz an awm bawk. Covid-19 vangin Christian Pulisic a inlan theih a la rinawm loh.

Liverpool dinhmun
Season hman zawh takah hliam vangin Liverpool an talbuai a, beisei an phak lo - nomawi chawi nei lo chungin season an khar a, season tawp lama an result avangin Champions League an khel phak hram.

Mahse, season a thar a, Virgil van Dijk leh Joel Matip an lo kir leh tak avangin Liverpool tlarhnung an ngaihtuahawm tawh lo. Bench-ah Joe Gomez leh Ibrahima Konaté an la nei cheu bawk a, season hmasaa an buainaah an buai ta lo hle.

Trent Alexander-Arnold a 'form' leh tawh a, Andy Robertson inhliam hlanin Konstantinos Tsimikas-a'n a hmun ruak zo takin a luah a, Chelsea lakah erawh Robertson a dam tawh avangin Scotland captain hi a inlan zawk a rinawm. James Milner-a'n hliam vangin Blues a hmachhawn theih a la rinawm chiah lo thung.

Tlarhmaah Mohamed Salah, Diogo Jota, Sadio Mane leh Roberto Firmino aṭangin Jurgen Klopp-a'n duhthlan tur a nei a, midfield-ah rawlthar duhawm Harvey Elliott aiah Thiago Alcantara a rawn lut ta a nih pawhin a mak lo ang.

Chelsea ṭha mah se...
Anfield-a inkhel tur mah ni se Thomas Tuchel-a hnuaia hma an sawn dan thlirin Chelsea-in rin an hlawh zawk a, hei hi Klopp pawhin a hai lo. Mahse, German coach chuan an zam loh thu a sawi.

Klopp chuan, "Inkhel hmuhnawm tak a awm ang tih ka chiang a, boruak a sang dawn tih hi ka ringhlel lo. Chelsea dinhmun a ṭha a, tun hnaiah hma an sawn nasa hle.

"Champions League nomawi an chawi a, Tuchel-a hnuaia an match zawng zawng deuhthawah an chak a, squad ṭha tak kha coach ṭha takin a enkawl a ni a, chu chu Chelsea nihna a ni.

"Mahse, kan khelmualah kan khel dawn a, Chelsea ang thoin kan kaltluan lai a ni bawk. Chu chu hman remchan kan tum dawn a ni," a ti a, hnehna chan theih a inbeisei.

VVD vs Lukaku
Zanin inkhela fans tam zawkin hmuh an châk chu Van Dijk leh Lukaku inhmachhawn tur hi a ni - player pahnih hi an 'position' ah chuan 'top' player ve ve an ni a, zanin inkhel tur boruak ti 'hot' zualtu an ni.

VVD ṭhatzia inhrilh nawn a ngai lo a, hliam vanga kum khat dawn a chawlh hnuah ngai a awh leh tawh em, tih hi zawhna zawk chu a ni. Dutch defender hian league match hnihah a khel ṭha takzet a, tlarhnung aṭanga a ball semchhuah thlengin 'duhthusam' a ni.

Mahse, Liverpool fapa rangkachak hian Norwich City leh Burnley chiah a la hmachhawn a, Lukaku-a 'class' striker a la hmachhawn rih lo. Belgian striker hian Arsenal an hnehna inkhelah goal a khung nghal a, Gunners tlarhnung a nghaisa a ni ber.

Manchester United-a 'Lukaku' ai khan Chelsea 'Lukaku' hi a ṭha tawh zawk tih tam takin an pawm ang. Inter Milan-ah khan Antonio Conte-a'n duat taka enkawlin striker hriam lehzualah a chhuah a, match 95-ah goal 64 a khung - zaninah fiahna hautak a hmachhawn dawn e.