Ronaldo-a'n Juventus a mangṭha, United-ah kir dawn?
Juventus manager Massi-miliano Allegri chuan nimin tlai khan Cristiano Ronaldo-a'n Turin club tan a khel duh tawh lo tih a sawi a, a chhuak dawn tih chiang mah se a chhuahna tur a la chiang lo.
Portugal captain hi Manchester City leh Manchester United nen sawizawm a ni a, Old Trafford a hnaih ta zawk.
Chhuah a duh
Khawvel player ropui ber zinga mi Ronaldo hian Juventus-ah season khat chauh contract a nei tawh a, season khatah euro maktaduai 31 a hlawh.
Italian club hian Ronaldo hi season liamta khan Serie A top scorer a ni chungin a hlawh a tam avangin chhuahtir an pawiti lo. European football expert Raphael Honigstein chuan, "Juventus hi Ronaldo tel emaw tel loin emaw an ṭhat dan a ngai
reng a, a hlawh leh a hnathawh hi a phu loah a ngai," tiin Italian club-in chhuahtir an duh chhan a sawi.
Juve manager Massimiliano Allegri erawhin Ronaldo-a'n chhuah a duh ve hrim hrim niin a sawi thung. Italian manager chuan, "Ronaldo hian team tan tha a thawh a, inkhel turin a inpeih ṭhin bawk. Tunah chuan a chhuak ang a, hringnun erawh a
kal ngaiin a kal ang. Ningani khan Juventus tana inkhelh a tum tawh loh thu min hrilh," tiin a sawi.
A chhuak dawn
Italian journalist lar Fabrizio Romano chuan nimin tlai khan Ronaldo -a'n Juventus -a a khelhpuite a mangṭha thu a ziak ve bawk.
Kum 36 mi Ronaldo hi a ropui tawhna ṭhin Premier League-a let leh tura sawi a ni. Nimin tlai khan Ronaldo hi private jet-a a chuang tur thlalak a darh bawk a, Juventus manager Allegri te meuh an ṭawngchhuah bawk avangin a chhuak ngei turah
a ngaih theih.
Hei le, Man City
Paris Saint-Germain chairman Nasser al-Khelaifi -a'n Ronaldo lak an tum loh thu an sawi avangin
Manchester City ni turah a ngaih theih nghal.
Ronaldo agent Jorge Mendes-a'n Portugal captain khelhna tur a zawng a, Harry Kane la thei lo Manchester City nen an sawizawm. City hian a thlawnin Ronaldo hi lakluh an duh a, Juventus lamin euro maktaduai 30 bawr vel an beisei thung.
Portugal captain hi a hlawh a tam avangin Man City hi Ronaldo manah an inseng tam ngam lo
niin a lang. Pep Guardiola chuan, "Ni li chhungin thil eng pawh a thleng thei. Mahni duh club thlang thei player tlemte chauh an ni a, chung zingah chuan Messi leh Ronaldo a tel. Man City emaw keimahin emaw a duh kan thlansak thei lo a, Ronaldo-a'n a khelhna tur a thlang ang," tiin a sawi.
Lionel Messi leh Ronaldo chungchang sawi zuiin, "Engmah sawi lawk theih a ni lo a, sawi theih chin chu kum 20-30 chhunga khawvel player ṭha pahnih an ni. An pahnih hi an hlawhtling em em a, hetiang ang hi chu kan hmuh leh lawk pawh ka ring lo," tiin a sawi.
Man City-in Champions League nomawi an la chawi loh laiin Ronaldo ringawt hian Man United
leh Real Madrid-ah UCL nomawi panga a chawi tawh a, hetiang player ṭha bik neih hi chu tute
pawhin an duh tur a ni hrim hrim.
United an rawn lang
Manchester United-in an club legend-in an hmelma Manchester City-a Ronaldo khel an hmu ngam lo nge, Eithad Stadium pan tura sawi Portugal captain dawr tumin hma an la a, an hlawhtlin hmel bawk.
Man City hian Juventus chhiarna euro maktaduai 30 pek an tum lo a, Man United-in Juve chhiarna hi an pe ngam a nih chuan chhuhsak harsa tur niin
a lang lo. Ole Gunnar Solskjaer chuan, "Ronaldo hian kalna tur a duh nih chuan kan awm e," tiin
nimin tlai press conference-ah a lo sawi ve chiah bawk.
Nizana he thuziah lai hi chuan Manchester United hian official-in Ronaldo hi dawr an tum tih a la ni chauh a, chutihrualin Italian journalist Fabrizio
Romano chuan, "Man United an inringtawk.
Juventus nen an indawrna turah hian Paul Pobga
a tel lo a, Manchester City-in Ronaldo an la dawn lo," tiin a ziak. Kum 36 mi Ronaldo chuan a larchhuahna hmun Old Trafford a pan dawn niin a lang ta a, he thuziah i chhiar meuh chuan thil thlen dan tur chu a chiang vek tawh hial ang.