UEFA Player of the year Jorginho

Chelsea leh Italy midfielder Jorginho chu UEFA hnuaia mipa player of the year 2020-21 atan thlan a ni. Kum 29 mi Jorginho hi Manchester City midfielder Kevin de Bruyne leh Blues midfielder N'Golo Kante chungah a awm.

Blues an chungnung
Ningani zan khan Istanbul-ah UEFA-in chawimawina a sem a, Champions League champion Chelsea-in mimal chawimawina dawn theih paruk zinga pali an hui.

Blues manager Thomas Tuchel chu coach of the year-ah thlan a ni a, Italy champion puitu Roberto Mancini leh Manchester City manager Pep Guardiola te aiin vote a hmu sang zawk. Chelsea player dang Edouard Mendy leh N'Golo Kante te goalkeeper of the year leh midfielder of the year atan thlan an ni bawk.

Jorginho hian Chelsea tan Champions League nomawi a chawi bakah Euro 2020-ah Italy a champion pui avangin Kante aia an chungnung hi a mak lo. Chutihrualin Copa America-a Argentina champion puitu Lionel Messi chu palinaah a awm.

Midfielder ṭha ber chawi-mawina erawh Kante chuhpui chi a ni lo a, French midfielder hi UCL semifinal (Real Madrid) leh final (Manchester City) a hnehna an chan ṭumin match of the match-ah thlan a ni vek.

Chawimawina dang
Manchester City defender Ruben Dias chu defender of the year-a thlan a ni a, Borussia Dortmund striker Erling Braut Haaland chu forward of the year a thlan a ni bawk.

Season liam ta khan Haaland hian match riat aṭangin goal 10 a khung a, top scorer a niin minute 70.5 danah goal khat zel khung ang a ni. PSG forward Kylian Mbappe leh Bayern striker Robert Lewandowski chungah a awm.

Dias hi Man City tlarhnung khai dingtu a ni a, match 11-ah clean sheet vawi ruk neiin goal nga chiah an chhuah. Final-a an hneh loh Blues defender Cesar Azpilicueta leh Antonio Rudiger te point hmuh belhkhawm aiin an hmu hnem zawk.