Goal nen Kane a inlar

Chhuak duh, mahse chhuak thei si lo Harry Kane-a'n Tottenham tan tun season bika a vawi khat nan inkhel bul a ṭan a, a cham tur thu a sawi hnua a match hmasa berah hian goal hnih a khung nghal.

Ningani zan Europa Conference League - qualifying playoff second leg inkhelah Kane-a'n goal hnih a khung a, a team hi Pacos de Ferreira lakah 3-0 in hnehna a chan pui. Portuguese club defender Pacheco Antunes chuan an mahni lamah a ti lut bawk.

Nuno Espirito Santo naute hi an intawn hmasakin 1-0 in an chak lo, tunah chuan striker ṭha Kane hoa an chak avangin inkhel pahnih belhkhawmah 3-1 in an chak a, Europa Conference League group stage an lut.

Spurs manager Nuno chuan, "Thil thleng tawhte kha chu sawi nawn a ngai lo, hun liam tawh a ni. Tunah chuan hma lam kan thlir zawk ang, kan kiangah Harry a awm a, a ṭhat dan bera khel chhuak tura puih chu kan tih tur a ni," tiin a sawi.

England captain Kane hian champion thei tur club zawm a duh thu a sawi tawh a, tun hnaiah Manchester City nen indawrna pawh an nei ngei. Mahse, North London club hian an chhuahtir phal bik lo, tun season chu a cham dawn tih a chiang tawh.

May 23 hnua inkhel bul ṭan leh chauh ni mah se a buai phah lo. Minute kuana lekah winger Bryan Gil-a siamsak a khung nghal a, chawlhlawk hmain ama sual chhuah hmangin an goal hnihna a khung leh bawk.

Kane hian club tana goal 223 a khung tling ta chiah a, an chak dawn tih a chian tawh avangin minute 72-naah thlak a ni. Pathianni zana Watford an mikhual hunah a tir aṭangin a inkhel leh nghal ngei ang, a tha khek duh vang chauh thlak an ni.

Nono-a enkawl Spurs hian Premier League match hmasa berah Man City 1-0 in an hneh a, match hnihnaah pawh goal khat fai bawkin Wolves an hneh - goal an la chhuah miah lo; Watford lakah Kane ho chuan goal tam zawk an khung ngei a rinawm.