Man City mualah tlak hlau Arsenal

Premier League chu team an intiat tlang, tlak hlau club pawhin champion tur an hneh nulh chang a awm. Champion lai Manchester City chuan tun season kal laia chak la nei lo Arsenal an mikhual dawn.

Vawiin tlai dar 5:00-a Etihad Stadium-a inkhel tur hi tunlai boruak thlir chuan, champion tum leh tlak hlau inkhel tia sawi theih a ni. Gunners hian hnehna changa an mangchhia an tireh thei a nih erawh chuan beiseina thar an nei ang.

Arsenal an harh?
Brentford leh Chelsea lakah goal khung loin Arsenal an tlawm a, hetiang baka season bul ṭan chhiat dan hi an tan a awm thei leh tawh chuang lo. Fans an zak a, mawhpuh tur an zawng, an dem rawn chu manager Mikel Arteta leh club neitu chhungkua an ni.

Spanish manager Arteta-a'n League Cup-ah result ṭha neih a duh, a player ṭha chhawr chungin 6-0 ngawtin an chak. Inrintawkna a siam belh ngei ang, a player pawimawh Pierre-Emerick Aubameyang-a'n hattrick siamin an theihna a pholang leh tawh.

Arteta chuan, "Auba hi a sir leh a laiah a khel thei ve ve, hun rei tak a inkhelh tawh chhung hian goal tam tak a khung tawh a, a khelhna hmun chu khawi lai pawh ni se harsatna a nei lo. A taksa dinhmun a zirin kan siamrem zel ang," a ti. Man City lakah a khelh ṭhat a beisei thu a sawi bawk.

Man City chungchang sawi zuiin Arteta chuan, "Ball an chang hnem a, anni kan hmachhawn a nih chuan dawhtheih a ngai zual hle. Pawng tawng nawr ngawt chuan chetsual theih a ni, a hunah tak kan chhu let tur a ni zawk," tiin khualmualah ball chan hnem an tum lo.

Gunners hian hliam vangin midfielder pawimawh Thomas Partey an la chhawr thei dawn lo, hri leng kai Ben White pawh a la inkhel thei lo ang. Rawlthar Bukayo Saka leh Emile Smith Rowe bakah Martin Odegaard te erawh minute 90 inkhel turin an inpeih.

Nicolas Pepe-a'n West Brom lakah a theihna sang tak a lantir, goal khat chauh khung mah se hun ṭha a sual chhuak hnem. Ivory Coast international hi Man City tlarhnung chhaih buai theitu tur a ni a, mual sir lamah a tlan chakna chhawr an tum ang.

City an ṭha tawk
Pep Guardiola hnuaiah chuan player khel ngei ngei tur sawi lawk a harsa. Season hmasa thlir chuan keeper Ederson leh defender rinrawl Ruben Dias te chu chianga ngaih an ni a, a dam a nih chuan Kevin de Bruyne chu thlan zingah a tel deuh ziah bawk.

Tun season-ah pawh Pep-a'n a kalphung a la tidanglam lem lo. Tottenham laka goal an khung loh hnuah Norwich City chu 5-0 in an sawp, striker Gabriel Jesus-a'n goal khung lo mah se a khel ṭha, a inlan chhunzawm ngei a rinawm.

Pound maktaduai 100 man Jack Grealish-a'n duhsak a la hlawh, chutih rualin a khelh danin a zir lo a nih vaih chuan hmun nghet a chang reng bik lo ang - Arsenal lakah erawh a inlan a rinawm a, North London club tlarhnung tana ven ngun ngai tur zinga mi a ni.

Riyad Mahrez leh Raheem Sterling te hi theihna nei sang tak, mahse season hmasa aṭanga hmun nghet chang thei meuh lo an ni - anni pahnih hi Norwich lakah bench lamah hun an hmang a, an luh hnuah erawh goal an khung ve ve, a tu emaw zawk chuan bul an ṭan tawh ang.

Hliam vangin De Bruyne a inlan thei dawn lo, an match hmasa pahnih thlir chuan midfield lai hi Man City duhthusam lohna lai niin a lang. KDB a awm loh chuan Ilkay Gundogan chungah mawhphurhna a sang leh ang.

An boruak thlir chuan Man City hi chak chiang tura ngaih an ni, an intawn hnuhnung 12-ah vawi hnih chauh tlawm an nei. Chutih rualin Arteta naute hian rin hlawh lo zawk ni chunga team ṭha barakhaih khut an ching, eng pawh thleng thei a ni.