Messi inkhel en beisei an tam

Lionel Messi-a'n Paris Saint-Germain a zawm hnuah match a la khel lo a, manager Mauricio Pochettino-a'n a player thar hi a inpeih fel hunah a chhawr chauh tur thu a sawi avangin a inlan hun tur hi chiang taka sawi theih a la ni lo.

PSG hian Pathianni zan 12:15 hian Reims an lenchilh dawn a, mikhual thleng tur Reims lam hian stadium a lut thei zat ticket an hralh zo vek tawh - Messi inkhel en chak mipuiin ticket an inchuh zo.

Kar thum liam ta khan Reims hian Montpellier an hmachhawn a, ticket 6,000 an hralh - stadium chhunga lut thei zat pawh a awl ṭheuh. Tunah erawh mi 21,000 tana ticket siam chu a an hralh zo vek tawh a ni.

Barcelona captain hlui Messi-a'n Ligue 1 club tan chawlhkar hnih chhung training a zawm tawh. Pathianni zanah hian minute 90 a khel lo a nih pawhin a inlan chu a rinawm tawh hle - Messi bakah Neymar pawh inlan ngei tura beisei a ni bawk.

PSG manager Poch chuan, "Engkim a kaltluang a nih chuan Reims lakah a inlan theih ka beisei," tiin Messi chungchang a lo sawi tawh, Ligue 1 club lianin beiseina sang tak nena an lakluh hi a inkhelh ngei a beisei awm tawh.

Reims lakah Messi hi a la inkhel lo a nih chuan international break a awm zui dawn. Argentina tana a fehchhuah leh daih a ngaih dawn avangin PSG fans lamin an nghah rei a ngai dawn hle tihna a ni - Messi inkhelh hun chhungchang chu Pathianni zanah a chhanna kan hmu ang.

Zanin Inkhel Tur
Nice 08:30 PM Bordeaux
Marseille 12:30 AM Saint-Etienne

August 29, Pathianni
Troyes 04:30 PM AS Monaco
Angers 06:30 PM Rennes
Clermont 06:30 PM Metz
Lens 06:30 PM Lorient
Strasbourg 06:30 PM Brest
Lille 08:30 PM Montpellier
Reims 12:15 AM PSG