England squad-ah a vawi khat nan Bamford
Euro 2020 final-a chak lo England-in World Cup 2022 qualifier khel tur squad an puang a, Three Lions tana inlan tura la koh ngai loh Patrick Bamford chu koh zingah a tel.
Liverpool right back Trent-Alexander Arnold chu hliam vanga Euro a khelh theih loh hnuin Three Lions squad-ah koh a ni bawk a, midfielder Jesse Lingard chu Euro-ah telh ni lo mah se World Cup qualifier atan erawh koh a ni ve bawk.
Chelsea left back Ben Chilwell leh Manchester United forward Mason Greenwood te chu player 25 awmna squad-ah telh an ni lo a, Chilwell hi tun season-ah Chelsea tan a la inlan lo.
Bamford chu
Season hmasa khan Bamford-a'n Leeds United tan Premier League match 38 khelin goal 17 a khung a, assist vawi riat a nei bawk. Hei vang hian Euro squad-ah tel a inring a, a pi leh pu kaltlangin Republic of Ireland tana inlan theihna dan a nei chungin England-in an koh hun nghah a thlang.
Mahse, Euro-ah player koh chhin 33 zingah pawh Bamford a tel phak lo a, tam takin an vuipui. Gareth Southgate chuan, "Season ṭantir chauh a la nih avangin player thar koh viau kan tum lo. Mahse, Phil Foden leh Marcus Rashford inhliam avangin tlarhmaah hmun ruak a awm a, Patrick-a tan hmun a inhawng ve ta a ni.
"Leeds-ah hma a sawn em em a, season hmasa pawh khan squad-ah a awm teuh hle. England Under-21 lamah kan thawhpui tawh a, amah leh a chhungte tan hun duhawm a ni," tiin Bamford a lawmpui thu a sawi.
England hmabak
Three Lions-in Euro final-ah 1-1 a Italy an inhnehtawkpui hnuin penalty-ah an tlawm zui a, Gareth Southgate hoin champion nomawi an chawi teuh takzet - tunah erawh thawnthu hlui hnuchhawnin an hma hun atan an inbuatsaih ṭan leh ta.
England hian September 2 zan dar 12:15-ah Hungary an lenchilh dawn a, September 5 zan dar 9:30-ah Andorra an mikhual thung ang. September 8, zan dar 12:15-a inkhel turin Poland an pan leh ang a, tun international break-a an match chu a zo ang.
World Cup qualifier, Europe-ah Covid-19 dan avangin khualmualah fans an awm a rem dawn lo a, England pawhin Hungary leh Poland-ah fans an nei dawn lo. Three Lions hi group I-ah an awm a, match thumah point kua neiin hma an hruai mek.
Mangṭha mangchhia
England-in penalty-a Italy an ngam loh khan Marcus Rashford, Jadon Sancho leh Bukayo Saka ten penalty an hlah a, sawiselna an tawh nasat piah lamah chi inthliarna lam hawia hmuhsitna thlengin an tawk.
Southgate chuan, "Final kan khelh zawh hnu khan an pathumin ka be reng a, an club pawhin an ngaihtuah em em a ni. Thlawptu an mamawh a nih chuan anmahni thlawp turin kan awm reng tih an hria a, mahse, hun kal tawh chu theihnghilh an duh tawh.
"Season thar a ni a, chona thar hmachhawn a hun tawh. Player naupang tak tak hmabak nei êng tak an ni," tiin a player-te chungchang a sawi.
England squad:
Goalkeepers: Sam Johnstone (West Brom), Jordan Pickford (Everton), Nick Pope (Burnley)
Defenders: Trent Alexander-Arnold (Liverpool), Conor Coady (Wolves), Reece James (Chelsea), Harry Maguire (Manchester United), Tyrone Mings (Aston Villa), Luke Shaw (Manchester United), John Stones (Manchester City), Kieran Tripper (Atletico Madrid), Kyle Walker (Manchester City)
Midfielders: Jude Bellingham (Borussia Dortmund), Jordan Henderson (Liverpool), Jesse Lingard (Manchester United), Mason Mount (Chelsea), Kalvin Phillips (Leeds United), Declan Rice (West Ham)
Forwards: Patrick Bamford (Leeds United), Dominic Calvert-Lewin (Everton), Jack Grealish (Manchester City), Harry Kane (Tottenham), Bukayo Saka (Arsenal), Jadon Sancho (Manchester United), Raheem Sterling (Manchester City)