AIFF-in hmeichhe football tihmasawn dawn

All India Football Federation chuan kum khat leh a chanve chhung Covid-19 vanga Football House, Delhi-a executive meeting an neih theih loh hnuah nimin khan meeting pawimawh tak neih a ni.

Hmeichhe football
AIFF chuan nakkum hian FIFA U-17 Women's World Cup a thleng dawn a, hei vang hian hmeichhe football tihhmasawn hi a ngai pawimawh hle.

Inelna hi kumina neih tur a ni a, Covid-19 vangin nakkumah sawn a ni. AIFF ruahmanna tharah chuan Indians Super League leh I League club zawng zawngin hmeichhe team an neih a ṭul tawh dawn.

India hian AFC Women’s Asian Cup India 2022 a thleng dawn bawk a, hemi a nih avang hian hmeichhe football inelna a tam thei ang ber buatsaih tum a ni.

Inelna dang
Kumin November thla hian Shillong-ah Club Futsal Championship buatsaih tum a ni a, India ram hmun hrang hranga futsal league nei state-te bakah ISL leh I League club zinga futsal club neite an tel dawn.

Hero I League qualifier pawh a rang lama buatsaih tum a ni a, I League pawh November-ah neih ngei an tum. I League qualifier hi Second Division I League tih ṭhin kha a ni a, I League khel tur zawnna a ni.

Covid-19 vangin nikum khan Santosh Trophy neih theih a ni lo a, tun season-ah erawh neih ngei an tum. November 21 aṭangin aṭangin qualifying round khelh ṭan a ni ang a, final round hi January 5, 2022-a khelh turin ruahmanna an siam.

Nimin meeting-ah hian Mizoram aṭangin MFA honorary secretary Lalnghinglova Hmar a tel a ni.