Inkhelh leh thuai kan duh - Ole

Ole Gunnar Solskjaer chuan Southampton nen an inhnehtawk zawha an duh ber chu inkhelh leh thuai a nih thu a sawi. Manchester United chuan August 29, Pathianni zan dar 9:00 hian Molineux Stadium-ah Wolverhampton Wanderers an hmachhawn ang.

Norwegian manager Solskjaer chuan, "Point hnih kan hloh khan pawi kan ti takzet a, inkhelh leh thuai kan duh. Season ṭantirh hi chu a dang ṭhin, season liam ta khan point ṭhahnem tak kan hloh. Kuminah erawh kan inpuahchah ṭha a, kan inpeih," tiin a sawi a, chak ngei an tum.

Cristiano Ronaldo chungchang zawhna chhangin Solskjaer chuan, "Han sawi belh chiam ṭul ka ti lo. CR chu he club tan hian legend a ni a, khawvel player ṭha ber a ni. Ka khelhpui tawh a, ka duh aia hmain ka chawlh phah ṭep. Thil thleng dan kan thlir zel ang chu," tiin a sawi.

Nimin tlai thuthangah chuan Man United pawhin Ronaldo hi an dawr leh hnuhnawh a, Man City sawmna a pawm hman tihte a awm. Thil awm dan thlirin Ronaldo hi Old Trafford-ah a let a rinawm loh.