Dembele-a'n contract thar a ziak hnai

Barcelona chuan an player, hliam vanga talbuai ngun tak Ousmane Dembele chu Nou Camp-ah chelh chhunzawm zel an tum a, kum 2025 thleng cham tura contract thar ziahpui an tum niin Spanish media-te chuan an tarlang.

Kum 24 mi Dembele hian kum 2017 khan Barca hi a zawm a, hliam vangin a inlan tam meuh lo thung. Season hmasa erawh a zia viau a, inelna hrang hrangah match 44 khelin goal 11 a khung.

Mahse, Dembele a vanduai a, France tana Euro khel tura a fehchhuahna lamah a inhliam a, Paris lamah a inenkawl mek nia sawi a ni - he thuziak i chhiar meuh chuan contract thar a ziak tawh mai thei.

Dembele hian June 2022 thleng cham turin Barca-ah hian contract a nei a, Catalan club-in contract thar ziahpui an duh chhan lian tak zingah a thlawna chân an duh loh vang tia sawi a awm.

Barcelona hian sum lama an talbuai avangin Lionel Messi an chelh thei lo a, an defender pawimawh Gerard Pique-a'n hlawh tihhniam rem a tih hnuah Sergio Busquets leh Jordi Alba-te chuan 25% ve vea hlawh tihhniam an rem ti leh tawh.

Catalan club-in khelmual pawn lama an buaina chinfel hna an thawk mek a, khelmual lamah erawh an 'chuti lua' thei rih lo thung. Tun season-a an match hmasa bera 4-2 a Real Sociedad an hneh hnuin Athletic Bilbao chu 1-1 in an inhnehtawkpui zui a, Pathianni zan dar 8:30-ah league match khel turin Getafe an mikhual ang.

Barca elpui Real Madrid chu zanin dar 1:30-ah Real Betis mualah an leng ang a, La Liga champion Atletico Madrid-in Pathianni zan dar 1:30-ah Villarreal an mikhual thung ang.