Champion turin kan ṭha tawk - Hamilton

Lewis Hamilton chuan amah leh a team Mercedes chu Formula 1 champion ni tura an ṭhat tawk thu a sawi a, chutih rualin season hmasa aiin kumin chu inelna a hautak hle dawn tih a sawi tel bawk.

Pathianni zan dar 6:30 hian Belgian GP an tlan dawn a, Britain tlangval hian hnehna a chang thei a nih chuan car intlansiakna sang berah vawi 100 a chak tlinna tur chiah a ni ang.

Vawi sarih champion tawh Hamilton chuan, "Tumah an fal thei lo ang, inelna hautak leh harsa tak a ni dawn. Chutih rualin inelna a san zawh poh leh a nuam ting a ni mai a, kei leh ka team chu a sang bera awm turin kan inpeih.

"Season kan hman tawh chin pawh hi a awlsam lo, hun rei tak chhung F1 hi ka lo hmachhawn ve tawh, kumin aia hautak hi ka la tawng lo hialin ka hria," tiin a sawi a, an elpui Red Bull leh Max Verstappen te an ṭhat tawk tur thu a sawi bawk.

Inelna an neihna tur Circuit de Spa-Francorchamps-ah hian tun hmain Hamilton hian vawi li hnehna a chang tawh, a elpui ber Verstappen erawh a la chak ve ngai lo - tun season an hman dan thlir erawh chuan inel tawk viau tura ngaih an ni.