Man City leh PSG group khatah an awm

Instanbul-ah Ningani zan khan Champions League draw neih a ni a, champion lai Chelsea chu Juventus, Zenit leh Malmo te nen group khatah dah kawp an ni.

Lionel Messi vangin Paris Saint-Germain chanchin in ngaihven a hlawh a, French club hi Manchester City nen group A-ah an awm. Group A ngaihnawmna belhchhah turin Cristiano Ronaldo chu Man City nen sawizawm mek a ni a, Portugal captain hi Juventus chhuahsan thei dinhmunah a ding.

Group A chu
Man City leh PSG awmna group a nih tawh chuan en a châkawm nghal a, German club RB Leipzig an awm tel avangin club lian pahnih hi knockout stage thleng lo theiah an ding.

Season liam ta khan Leipzig hian Manchester United chu UCL aṭangin an pet chhuak tawh a, kuminah pawh Man City leh PSG tan fimkhur a ṭul ang.

Club Brugge erawh an khingpui turte ngaihtuah chuan an te ta deuh, an tih theih sang ber chu pathumna niha Europa League khelh a ni.

Group of Death
Group B-ah club lar ṭhiau pali Atletico Madrid, Liverpool, Porto leh AC Milan te an awm a, group of death tia chhal theih an ni ang.

UEFA tehna aṭanga team nem bera ngaih AC Milan hi season liam ta khan Serie A-ah pahnihna an ni a, Europe-a sulhnu nei ṭha ber zinga mi an ni.

Milan bakah Liverpool leh Porto ten UCL nomawi an chawi vek tawh a, nomawi la chawi lo Atletico Madrid hi ṭha bera ngaih an ni zawk. Chuvangin group B paltlang hi a awlsam dawn lo.

Europa final rematch
Group F-ah Europa League final rematch a awm thei dawn a, Villarreal leh Manchester United te awm kawp hi inkhelh hma hauhin sawi zui tur a tam nghal.

Season liam ta khan Ole Gunnar Solskjaer-a hoten group stage an paltlang thei lo a, tun season-ah Villarreal bakah Italian club ṭhang duang Atalanta an awm dawn avangin chetsual theihna a ni ang.

Team nem ber tura ngaih Young Boys hi Swiss Super League champion an ni a, group stage thleng tura an kalkawng thlirin point hmu lo chuan inelna hi an khar bik a rinawm loh.

Engtin zel?
Group C-ah Sporting CP, Borussia Dortmund, Ajax leh Besiktas te an awm a, an ṭha rual hle. Group D-ah Inter, Real Madrid, Shakhtar Donetsk leh Sheriff Tiraspol te an awm ho a, Inter leh Los Blancos an ṭha fal.

Chutihrualin Sheriff hi Moldovan club zinga UCL khel hmasa ber an ni a, an tan chuan an thlen chin apiang hi hlawhtlinna a ni thei ang.

Bayern leh Barcelona te group E-ah an awm kawp a, Benfica leh Dynamo Kiev te an awm bawk. German club leh Spanish club-in knockout stage an lut lo a nih chuan 'upset' tia sawi theih a ni dawn.

Group ngaihnawm loh berah group G a thlan theih. He group-ah hian LOSC Lille, Sevilla, Salzburg leh Wolfsburg ten awm khawm a; he group aṭanga tlang hi last 16-ah pawh tum an châkawm ang.

Group inṭhen dan
Group A: Manchester City, Paris Saint-Germain, Leipzig, Club Brugge
Group B: Atlético Madrid, Liverpool, Porto, AC Milan
Group C: Sporting CP, Borussia Dortmund, Ajax, Besiktas
Group D: Inter, Real Madrid, Shakhtar Donetsk, Sheriff Tiraspol
Group E: Bayern, Barcelona, Benfica, Dynamo Kyiv
Group F: Villarreal, Manchester United, Atalanta, Young Boys
Group G: LOSC Lille, Sevilla, Salzburg, Wolfsburg
Group H: Chelsea, Juventus, Zenit , Malmö
_____________________________________

Hriattur pawimawh
Group stage khelh hun
Matchday 1: 14/15 September
Matchday 2: 28/29 September
Matchday 3: 19/20 October
Matchday 4: 2/3 November
Matchday 5: 23/24 November
Matchday 6: 7/8 December

Round of 16 draw: 13 December
Round of 16 first legs: 15/16/22/23 February
Round of 16 second legs: 8/9/15/16 March

Quarter-final and semi-final draw: 18 March
Quarter-final first legs: 5/6 April
Quarter-final second legs: 12/13 April
Semi-final first legs: 26/27 April
Semi-final second legs: 3/4 May

Final: 28 May
Tun season UCL final hi Saint Petersburg, Russia-ah khelh a ni ang.