Bayern khingpui tur Hertha Berlin

Bundesliga champion Bayern Munich chuan zanin dar 10:00 hian Allianz Arena-ah Hertha Berlin an mikhual dawn a, Julian Nagelsmann-a hote tan point thum hmuh ngeina tur a ni thei ang. Hertha Berlin hian match hnih an khelh tawh aṭangin point an la hmu lo a, table mawngphahah awmin Bavarians laka point hlawh chhuak tur chuan vanneihna an mamawh ang.

Bayern Munich hian league match hmasa berah Borussia Monchengladbach laka point khat chiah an hlawhchhuah hnuah vawi thum an chak zawn leh tawh a, an match hnuhnung berah fifth division club Bremer SV chu 12-0 zetin an sawp. DFB Pokal-ah Robert Lewandowski bakah player ṭha ṭhenkhat hahchawlhtir an ni.

Nagelsmann-a tan Hertha Berlin hi inzirna hun ṭha a ni thei ang a, tlarhnung rem phui dan ṭha zawk enchhinna hun pawh a ni thei dawn. Bayern ṭantuten match hnih ngawt an auh el tawh Leroy Sane tan a theihna pholanna hun a ni thei a, Nagelsmann chuan Manchester City winger hlui hi mual vei lam sirah a ṭhat theih a rin thu a sawi.

Bremer nen an inkhelh ṭumin Eric Maxim Choupo-Moting-a'n goal li zet a khung a, zaninah erawh Robert Lewandowski a inlan a rinawm tawh zawk. Jamal Musiala pawhin Bremer lakah hian goal hnih a khung a, Germany international midfielder hi Nagelsmann hnuaiah hian mual sirah pawh a ṭangkai hle.