Zaninah basketball inkhel hmuhnawm Khatla TBL Vs Zarkawt BCA

Mizoram Super League Sea­son lina tawp lamah inkhel boruak a nung thar a, zanin dar 8:00-a Khatla TBL leh Zarkawt BCA inkhel tur hi en châkawm ber zinga mi a ni.

Hawla Indoor Stadium-ah tualchhung player ṭha rual an inlan dawn. Game 1-ah vawi hnih champion tawh Khatla TBL an chak lo a, inkhelh zawhah India national team coaching staff-a tel pha H. Laldinsanga'n a chet dan hmangin chak lo zawkah a indah lo tih a lantir - hei hi zanin inkhel hmuhnawmna belh­chhahtu tur a ni.

TBL an ral?
MSL1-ah Khatla TBL hian league round-ah Zarkawt BCA vawi hnih an hneh a, final-ah an hneh leh bawk. MSL season hnihnaah vawi khat inhmachhawnin TBL-in an sawp a, Mizorama basketball inelna sang berah Khatla hian a zawnin vawi li an khingpui hi an hneh tihna a ni.

MSL3-ah BCA an inthuam ṭha a, league round-ah TBL a vawi khat nan hneh mah se semifinal-ah Khatla bawk an chungnung. A zawna vawi thum final an thlen theih nan Mapuia kaihhruai team hian 2-1 in an hneh a, game 3-ah phei chuan 73-46 in an sawp.

Tun season-ah Khatla-in Mapuia tel loin bul an ṭan a, league round-ah BCA an hneh lo a, semifinal pawh vanneihna nen an thleng hram. Game 1-ah Saron Veng tlangval Mapuia rawn tel mah se hun rei lote chhungin a siam ṭha vek thei bik lo a, 73-69 in an chak lo.

Tihian MSL bika an head to head-ah TBL hian 6-4 in hma hruai tho mah se match hnuhnung pahnihah BCA an chak tih hriat tel erawh a ṭha.

Sawp theih chuan sawp
Zarkawt BCA coach Lal­ruat­fela chuan, "Khatla TBL hi tun hmain kan ngam lo ṭhin a, tunah erawh a danglam chho zel. Mapuia a tel emaw tel lo pawh ni se TBL hi kan dahhniam ngai lo hrim hrim a, kan theihna zawng zawngin kan khel dawn," tiin an khingpui tur a dah san thu a sawi.

Tun season-a la chak vek Afela chuan sawi chhunzawmin, "MSL1-ah khan min hneh vek a, tun season-ah hneh vek theihna remchang a awm takah chuan bawhpelh loh kan duh. Kan sawp thei a nih pawhin kan sawp ang," tiin Khatla lakah zahngaihna lantir an tum lo.

Mizo hlanga khelh nawmna sawi zuiin BCA boss chuan, "Tunah chuan state pawn player an thleng thei dawn nge min hawsan dawn tih velah buaina a awm tawh lo. Lawm takin kan player neih training kan pe thei a, phur takin semifinal kan hmachhawn thei ang," tiin Vanglaini a hrilh.

Lalrina telna
Game 1-ah announcer-in bul ṭan tur hming pali a puang tawh a, pakhat an hmaih. A tawpah Lalrina Renthlei hming an rawn puang a, MSL3-a Mission Veng Vikings champion puitu rawn luh lai hian thawm a ring ṭha hle.

Tuikhuahtlang tlangval Lal­rina chauh hi BCA inngah­na a ni lo; Zonunsanga, Dennis Lal­muanpuia, Henry Lalram­ngaihawma, Matthew Sailo leh R. Lalfakawma te bakah Serpents aṭanga an lakluh Lalsangkima te hi chakpui tham vek an ni.

BCA tan an match hnuhnung ber aṭanga insiamṭhatna tur a awm a nih chuan freethrow chu a pawimawh hmasa a ni a, an chhawm zel tur erawh passing game mawi tak an neih hi a ni.

Theihna a awm
Khatla TBL-in a chung bera awm an duh a, chumi tur chuan Mizo player pawh an la ṭha. Tun season-ah ṭum dang an phak lohna chhan chu Mapuia'n a ho hman loh vang a ni a, Saron Veng tlangval awm hnuah hmuh theihin hma an sawn.

Hollow aṭanga an lakluh Vanlalṭhazuala'n MSL nomawi chawi tawh zingah inthla­hrun­na a nei lo a, player thar Vanchuangpuia leh Lallian­sanga te an ṭangkai a, Mapuia'n upat lamah thathona nen court chhungah a la ho thei bawk.

Amaherawhchu Khatla TBL-in hnehna chan an duh a nih chuan team pumpuia an chet ṭhat a ṭul a, nomawi an chawi ṭuma player pawi­mawh Vanlalmuana, Gospel Lalthawmmawia, Eddie Zai­than­mawia, Nelson Lalrohlua leh Vanlalnunsanga te an chet ṭhat a ṭul. TBL coach Mapuia'n semifinal hmasa ber leh game 2 inkarah kar khat chhung team siam ṭhatna hun a nei a, zaninah hemi chhunga an hnathawh a lang ang.