A thiam pariat zingah Liverpool

Anfield-ah Liverpool-in goal khung lo mah se khualmualah goal nga an khung sa avangin Champions League quar­terfinal an lut. Premier League lamah Reds hian Inrinni zan dar 6:00 hian Old Trafford-ah Manchester United an hmachhawn ang.

Liverpool hian Thawh­­lehni zan khan Porto an mikhual a, 0-0 in inhnehtawk mah se first leg-a 5-0 a an lo chak tawhna chu a thiam pariat zinga tel tir turin a tawk - kum 2009 hnua quarterfinal an luhna hmasa ber a ni.

Mak ti suh u
Inkhelh zawh hnuah Liverpool manager Jurgen Klopp chuan Reds chu an awmna tur hmun dik takah an awm thu a sawi a, a thiam pariat zinga an tel ta chu mak tih chi a nih loh thu a sawi.

German coach chuan, "Quarterfinal kan lut hi thil mak a ni lo a, kan awmna tur dik tak zawk a ni," a ti. March 16-ah quarterfinal-a inhma­chhawn tur a chiang dawn a, Klopp chuan tupawh hmachhawn tura an inpeih thu a sawi nghal.

Klopp chuan, "Team ṭha dang pasarih nen kan awm dawn tihna a ni a, a awlsam lo ang. Eng team nge kan hmachhawn dawn tih ka ngaihtuah lo a, kan hmaa ding apiang kan hmachhawn ang," a ti.

Hmanah chuan...
English club zingah Liverpool tluka Cham­pions League nomawi (5) chawi hnem an la awm lo a, final an khelh hnuhnun ber erawh May 2007 daih tawh khan a ni - Athens khawpuiah 2005 final-a an hneh AC Milan an ngam lo a, kum 11 dawn a liam ta.

Khatih hunlai khan Europe-ah chuan Liver­pool tum an châkawm ngai lo a, tunah erawh 2009-10 season hnuah tun hi Champions League-a an inlan leh vawi hnihna chauh a ni!

Liverpool boss Klopp chuan semifinal thlir nghalin, "A thiam pali zinga tel turin theihna kan nei a, chu chu kan tum hmasak ber tur a ni. Kan hmaa in­chhawp ang zelin kan inbuatsaih ang," a ti a, champion erawh a sawi ri duh rih lo.

Mangṭha Casillas?
Porto goalkeeper Iker Casillas-a'n season tawp rualin Portuguese club a chhuahsan tawh dawn a, a kalna tur a la chiang lo. Kum 36 mi goalkeeper hi a kum a tam tawh avangin Champions League khel phak team-ah a tel a beiseiawm tawh lo a, Anfield-a a inkhel hi CL match a khelh hnuhnung ber a nih pawhin a mak lo ang.

Spanish goalkeeper hian Champions League-ah match 167 ngawt khelin he inelnaa inlan tam ber a ni a, amah hnaih bertu Barcelona midfielder hlui Xavi chuan match 151 khelin match 16 ngawtin Casillas-a'n a khel tam zawk - Real Madrid legend hian Reds tana Danny Ings shot ṭha zet chu hun tawp hnaih lamah a dan sak.

Liverpool tan hian hliam vanga inlan tam lo Ings hi second half-ah luhtir a ni a, thla hnih hnuah Adam Lallana chuan inkhel bul ṭanin Joe Gomez hmel hmuh tur a awm leh ta bawk. Merseyside club tan Mohamed Salah-a'n inkhel bul ṭan lo mah se second half-ah luhtir a ni a, chawlhlawk hman hnuah inkhel bul ṭan Sadio Mane leh Roberto Firmino te lakchhuah an ni thung.