Phulpui tláng leh Reiek tláng khâr rih

Phulpui Branch YMA chuan ngenna leh hriattirna tichuakin, tunlaia khawvel hmun hrang hranga Coronavirus hri lêng vangin Zawlpala Thlantlang chu nimin aṭang khan tlawh theih loha khâr rih a nih thu an tarlang a, mipui hriatthiamna an ngen.

Reiek V/C leh tlawmngai pawlte pawhin thuchhuah siamin, Reiek tlang leh tlang behchhana intihhlimna hmunte chu vawiin aṭangin tiam chin awm loa khar rih a nih dawn thu an tarlang a; Reiek khuaa lut leh chhuak turte chu Coronavirus chungchangah fimkhur turin an chah bawk. Phulpui Branch YMA chuan, ṭhál a ni a, khua a lum ṭan a, Phulpui ram chhung Tuirivâng lui dungah, a bikin Rangtla velah ṭhian­ho leh chhungkua, intihhlim paha picnic tura kal an tam leh ṭan tih sawiin, lui dung khawi laiah pawh chêtsual theih a nih avangin fimkhur taka awm turin luia kalte an ngen a; him tlân zawk nan intihlim/picnic-a kalte chu zan dar 8 hmaa lui chhuahsan turin an chah.

Tuirivanga nungchate chu YMA-in an humhalh tlat tih sawiin Phulpui YMA chuan, "Luia nungchate eng hmanraw hmang pawha man phal a ni lo. Man lui leh hrâi lui an awm a nih a, man chhuah an awm a nih chuan Phulpui Branch YMA-in lui dung humhalhna dan a siam angin an chungah action lak a ni ang," an ti.