Vawiinah I League champion a hriat dawn
Tun season-ah I League match thum chauh khelh tur a awm tawh a, vawiin tlai dar 3:00 hian Gurgaon, Kolkata leh Kozhikode-ah te inkhel pawimawh a awm dawn.
Tau Devi Lal Stadium, Gurgaon-ah champion tura dinhmun ṭha ber Minerva Punjab-in Churchill Brothers an mikhual ang a, Salt Lake Stadium-ah East Bengal-in an elpui Neroca an mikhual ang a, Kolkata club Mohun Bagan-in Kozhikode-ah Gokulam Kerala an lenchilh ang.
Boruak a sang
Minerva Punjab chu match khat chiah a awm tawh tihin East Bengal chet dan chungchangah AIFF lakah an zualko.
Punjab club chuan EB hotu zinga mi Alvito D’Cunha-a'n Chennai City coach V Soundararajan, team official ṭhenkhat leh player-te a be lawk a; Soundararajan chu a hoten Minerva an hneh chuan nuai 10 pek an tiam niin an sawi.
Alvito hian CCFC manager leh player-te chu Minerva chaktir tumah a puh niin an hek bawk. Heng an puhna te hi fiahna a awm lo a, a taka hriat theih chin erawh South Indian club hian Red and Gold laka 7-1 a an chak loh hnuah Minerva hi 2-1 in an hneh.
Punjab club hian EB goalkeeping coach Abdul Azim Siddique chuan Minerva coach Khogen Singh a rilru tibuai turin a bia niin an hek bawk. AIFF laka an zualko danah chuan Siddique hian, "Minerva-in season tharah Santosh Kasyhap an lalut tawh a, Punjab club-ah hmalam hun a nei tawh lo. Amaherawhchu thutlukna a siam fuh chuan East Bengal-ah hmun a siam sak dawn," tiin Khogen hi a hrilh niin an sawi.
East Bengal lam chuan Minerva neitu Ranjit Bajaj chu ṭanfung ṭha nei loa mi puh ching niin an chhuah a, I League CEO Sunando Dhar chuan an puhna te hi a dik a nih chuan a ṭul anga hremna an lekkawh ngei tur thu a sawi.
Inkhel tur chu
Minerva khingpui tur Churchill Brothers hian hnehna an chan chuan Chennai City chungah awmin relegate lo thei an la ni a, ṭan chhan tur an la nei tihna a ni. Goan club hian tlarhma tihchak nan an chhuahtir tawh Jeancy Zunapio Siyo thlak nan season tira East Bengal striker Willis Deon Plaza chu Mohammedan aṭangin an lalut.
Churchill Brothers coach Alfred Fernandes chuan, "Minerva-in champion an duh a, keini lamin I League khelh zel kan duh. Team pahnih tan pressure a sang hle," tiin inkhel tur chungchang a sawi. Amaherawhchu hetah pawh hian thuchiang lo a awm.
Chennai City hi I League-a inlei tling an nih avangin season khat chhung an tlak theih loh hnuah tun season-ah pawh tla thei lo dinhmuna din zel an duh a, amaherawhchu I League thuneituten Churchill hmai zahin an thutlukna an la puang zar lo. Goan club hian point an hmu lo a nih chuan I League thuneitute tan buaina pakhat chu sut kianin a awm ang.
Champion team-ah Mizo
Team pali an champion thei a, Minerva Punjab-in Vanlalbiaa Chhangte an lakluh leh tak avangin nomawi chawi thei team zingah Mizo an awm vek.
Neroca-ah Champhai tlangval David Lalbiakzara a awm a, Mohun Bagan-in Ricky Vanlallawma an kawl a, East Bengal-ah Lalramchullova, Brandon VL Remdika leh R. Laldanmawia te an awm bawk.
Vawiin hian I League champion a hriat dawn a, Mizo zinga tute emaw ber hian nomawi an chawi ang.
Vawiin Inkhel Tur
3:00 PM East Bengal Vs Neroca
3:00 PM Gokulam Kerala Vs Mohun Bagan
3:00 PM Minerva Punjab Vs Churchill Brothers