$umin a lei zawh loh Champions League

Mangṭha Paris Saint-Germain, Champions League nomawi hi mahni duh hunah sum hmanga lei ngawt theih a ni lo. Thawhlehni zan inkhelah Cristiano Ronaldo leh Casemiro te goal hmangin Real Madrid chuan PSG chu an buzawlah 2-1 in an luhchhuah a, inkhel pahnihah 5-2 a hnehna changin UCL quarterfinal an lut.

Real Madrid-in Santiago Bernabeu Stadium-ah 3-1 in hnehna an chang tawh a, Parc des Princes-ah pawh Ronaldo bawk a langsar hmasa, Portugal captain hian Lucas Vazquez-a cross tauh lutin a team chu dinhmun ṭha takah a hlangkai.

Neymar tel loa khel PSG midfielder Marco Verratti chu yellow card vawi hnih hmuh vangin hnawhchhuah a ni a, striker Edinson Cavani-a'n goal khat khung ve mah se Casemiro-a'n Spanish chakna nemnghehna goal a khung.

Zinedine Zidane-a enkawl Real Madrid hian a zawnin season riat chhung quarterfinal an lut ta a, a zawna a vawi thum nan nomawi chawi an tum; PSG erawh a zawnin season hnih chu last 16 an paltlang zo ta lo - Paris club hian an duh ber an la hmu dawn lo.

Phurrit a kiang
Real Madrid hian nikum August thla khan Spanish Super Cup an la a, December thla khan FIFA Club World Cup an chawi bawk. Mahse, La Liga lamah beisei an phak lo, hmahruaitu Barcelona aiin point 15 zetin an hniam zawk. Manager Zidane chungah boruak a rit hle.

Amaherawhchu, France manager hi a chunga boruak leng vel vangin a buai chuang lo. Ligue 1 team ṭha PSG lakah Toni Kroos, Luka Modric leh Gareth Bale te chu bench-ah a dah ngam, khelmual sir lam aṭanga counter attack hmanga bei turin ball thiam leh tlan chak Vazquez leh Marco Asensio te a dah thung.

Zidane-a'n thutlukna a siam sual lo, defender Dani Alves tihsual vangin hun ṭha an nei. Vasquez-a'n mual sir aṭanga a ball cross ṭha zet chu Portugal forward Ronaldo-a'n hnai tak aṭangin a tauh lut, tun season UCL-a a goal 12-na chiah a ni.

Uruguay international Cavani-a'n buai nuaih aṭangin an si phurh sut ṭhen ve mah se, PSG midfielder Adrien Rabiot ball pet chhuah fuh lo dawngtu Casemiro-a ball pet chuan Marquinhos a per a, keeper Alphonse Areola rin loh dana ball a kal avangin dan theih a ni lo.

Real Madrid hian Asensio leh Vasquez te hmagin woodwork vawi hnih an tih per bawk a, Champions League match hmasa paruk aṭanga goal 25 khung thei PSG lakah goal khat bak an chhuah loh avangin a tlang zawk nih an phu hle.

Nomawi a hla
Arab sum hmanga insiam lian Paris St-Germain hian tun hnaia kum nga chhungin Ligue 1 nomawi vawi li an chawi thei a, kuminah pawh champion lai AS Monaco aiin point 14 zetin an sang fal mek.

Paris club hian nomawi dang chawi turin harsatna an nei lo a, an duh ber chu European champion nih a ni. Europa League vawi thum champion ni thei Unai Emery an lalut a, Spanish manager tana hna thawh tinuam turin Barcelona duh lai Neymar chu pound maktaduai 200 teh meuhin an lei chhuak bawk.

Brazil captain Neymar awm chungin Real hi 3-1 in an ngam tawh lo a, hliam vanga Neymar a inlan theih loh zanah midfield thunun thei tura ngaih Verratti chu Casemiro lakah a foul vanga yellow card pek a nih bakah, second half-ah Italy international hian referee Felix Brych lakah a lungawi lohna a lantir chiam avangin hnawhchhuah a ni.

Goal an phurh bakah player pakhata an tlem zawk hnuah tho chuak turin PSG-in chakna an nei tawh lo a, league match 28 an khelh aṭanga goal 86 khung thei team hian Real tlarhnung an su nghing thei lo - dinhmun harsa a an din zanah pound makatduai 165.7 man ni mai tur Kylian Mbappe chu a la patuai deuh bawk.

PSG hian 1994-95 season khan Champions League semifinal an khel a, tun hnai chhoah sum hmangin player ṭha lalut chiam ṭhin mah se quarterfinal an la paltlang leh lo. Club neitu lamin an duh ber an neih theih leh dawn tak lohah chuan Sevilla manager hlui Emery hma hun a chiang lo zui a nih pawhin a mak lo ang.

Eng nge an sawi?
PSG manager Unai Emery chuan, "A nihna taka sawi chuan Real Madrid khan round sang zawk luh an phu, hun pawimawhah an che fuh thei a, an ṭha zawk a ni. Inkhel kha 60% ngawt an thunun thei a, keini lamin 40% kan chan ve kha hnehna chan nan a tawk zo lo.

"Real Madrid hneh loa tlak chu a na lo deuh pawh a ni thei, mah se last 16 aṭanga tlak chu pawi tak a ni. Spain-ah kha chuan 50-50 a ni a, tun ṭumah erawh first half tawp lam minute 20 chhung bak kha chu kan chunung hleithei lo," tiin a sawi.

Real Madrid manager Zinedine Zidane chuan, "Bul kan ṭan fuh, hnehna chan kha kan phu. Round sang zawk luh duh leh team ṭha tak ni bawk kan intawn avangin inkhel hautak tak a ni," a ti.

A zawna Champions League nomawi chawi thei Zidane chuan sawi zawmin, "PSG khan hnehna chan an duh avangin fans pawhin an ṭawiawm ṭha a, boruak pawh a sang hle. Mahse, khatiang karah pawh khan ka nauten an rilru leh theihna zawng zawng an hlan avangin fak an phu," tiin a sawi.