MSL aṭangin Hollow BBSP an tla

Mission Vengthlang Hollow BBSP chuan Mizoram Super League Season 4-ah chak hmel an hmu lo a, relegation playoff game hmasa pahnihah an chak loh ve ve avangin game 3 khelh ṭulna a awm ta lo. MSL aṭangin Hollow BBSP an relegate a, Republic VR4-in Mizoram chhunga basketball inelna sang ber khel zel turin beiseina an nei thung.

Thawhlehni zan Hawla Indoor Stadium-a inkhelah VR4 chuan 68-61 in Hollow an hneh a, playoff khel turin thla khat chhung inpuahchahna an nei zui ang. March 26-28 hian Zarkawt Serpents, BC Bethlehem leh Kolasib Time Out ten MSL5 Qualifying an khel dawn.

MSL5 Qualifying-ah hian vawi khat ṭheuh an inhmachhawn hnuah a sang berin Hollow BBSP hmun ruak luah khatin MSL khel turin an tling ang a, pahnihna hian VR4 nen April 2, 5 leh 6 hian hmun ruak pakhat an inchuh ang.

Zin kawng bumboh
Hollow BBSP hian February 2016 khan Chawnpui VR4 hnehin coach Samuel Lalthlamuana hoin MSL khel turin an tling a, amaherawhchu MSL3 ṭan hmain guard talent nei ṭha Zonunsanga'n Zarkawt BCA a zawm san.

MSL3 hi state pawn player ṭha tam ṭum a nih avangin ama chherchhuaha lungawina hmu ṭhin coach El-a tan a harsa a, Chanmari hminga khelin semifinal thleng pha loin relegation playoff khelh hnuah MSL khel zel turin an inham tang hram.

MSL4-ah Hollow-in Mission Vengthlang hmingin an khel a, player chelh chungchangah harsatna an nei zui zel. Lalnunpuia Renthlei-in Tuikual South a zawm a, Vanlalṭhazuala'n Khatla TBL tana khelh a thlang ta bawk. Coach El-a hnuaia inzir chhuak R-a, Ṭhazuala leh Zonuna te hi MSL4-ah an club khelhna ṭheuhah player pawimawh an ni. Hollow hian MSL khel tura ziahluh ARC basketball player Lalhmachhuana leh Lalruatfela ten league round an nang hman lo a, tawnhriat nei an tlem avangin relegation playoff an khelh a ṭul ta hi a mak lo.

A tawp thlengin
Hollow-in league round-a chak hmel an hmuh loh hnuah pawh beiseina an la nei a, game 1-ah 69-51 zetin Republic VR4 hneh loh mah se beiseina tih mitin a la awm lo, a chhan chu a player pawimawh Hma-a leh Ruatfela te an chah thlen theih an inbeisei vang a ni.

Game 2 khelh niah Hma-a leh Ruatfela ten Aizawl an rawn thleng a, darkar tam pawh hahchawl hman loin Republic VR4 an hmachhawn nghal a, chutichung chuan relegation playoff inkhel an tih hmuhnawm phah hle. Hollow-in Ronald Zomuanpuia an neih sa bawk avangin VR4 an talbuai a, Republic Veng an hlauthawng.

Hma-a chevel hmuhnawm tak chuan mipui mit a la a, amaherawhchu hun tawp lamah a chau tih zep rual a ni lo. Ramthar tlangval hian point 17 nei mah se second 30 chiah a awm tawh tihin a foul out a, VR4 lam an tho huai. Ruatfela'n (11 pts) tharum nen ṭha takin khel mah se match fitness a nei tawk lo a, point 16 score-tu Ronald-a pawh Hma-a awm avanga inrintawkna a hloh avangin a luh theih tur tur ang zat a lut pha lo.

Hollow-in inkhel an thlir kir ang a, game 2-ah hnehna chang hram se game 3-ah chak tura rinkai zawk tihin an inchhal thei ang. Coach El-a'n MSL an tlin tirha a player ang kha kawl vek se MSL4-ah champion theih a inbeisei ang a, tunah erawh a zo tawh a, MSL khelh zel theihna leh nomawi chu suangtuahna chauh a ni ta.

Chak phu VR4
Republic VR4-in league round-ah Hollow chauh hneh mah se Tuikual South leh Khatla TBL an tihbuai theih avangin MSL khelh zel an phu. Relegation playoff game 2-ah pawh tawnhriat nei ṭha R. Darliansanga (12 pts) leh Lianhmingmawia (13) te an neih bakah ṭha tura beiseiawm David Lalruatfela (15), Lalpekhlua (12) leh C. Lalchhandama(7) te an kawl avangin belhchian an dawl hle.

Game 2-a hnehna chang turin 55-57 a hma an hruai laiin Fela'n 3 points a lut a, hemi zawh chiah hian Dara'n three-point play nei zuiin freethrow a lut a, hun harsaah hahdam zawkin an khelh theih phah. MSL-a tawnhriat nei ṭha coach Liansangpuia'n time out a hmang ṭha a, Khalta TBL leh Tuikual South an hneh loh ṭum angin quarter linaah an phili buai tawh lo a, hun tawp meuh chuan point sarihin hnehna an chang.