Gattuso-a'n Arsene leh Arsenal mikhual dawn

"Brad Pitt kan ni lo a, ka hmel rorum leh ngaihno bei lo ang ang tak hian kan lo mikhual ang," tiin Gennaro Gattuso chuan zanina an mikhual tur Arsenal lakah ṭhat an chhuah loh tur thu a sawi.

AC Milan midfielder rorum ni ṭhin, tuna Milan enkawltu ni ta Gattuso-a'n European football bikah player a nih laia English club a hmachhawn hnuhnun ber chu 2006 kha a ni. Kha mi ṭum khan Gattuso hian Tottenham assistant coach Joe Jordan a rek a, match nga chhung hrem a ni.

Arsene Wenger a nauten Europa League last 16 first leg khel turin, zanin dar 11:30 hian mikhual tana lenluh chak awm lohna tak mai San Siro an tlawh dawn. An hmachhawn tur Gattuso hi player ni tawh lo mah se a naute chu huaisen taka bei turin a fuih dawn tih a chiang–boruak a dai dawn lo.

Milan a inpeih
Italy international hlui Gattuso hian player a nih laiin Carlo Ancelotti kaihhruaina hnuaiah Champions League nomawi a chawi tawh a, player a nih laia tawnhriat a ngah tawh avangin nikum November thlaa Milan enkawl hna a thawh hnuah pawh hmasawnna a thlen chho mek.

Tun hnaiah Milan hi match 13 chhung chu tlawm miah loin an kaltluang tawh a, inelna ngaihhlut pakhat Coppa Italia final an lut tawh bawk–an match hnuhnung parukah phei chuan goal an chhuah miah lo. Tun hma lama Italian defending khawng leh hmuhnawm tak ang kha an nei let leh mek.

Kum 40 mi Gattuso chuan, "Tunah hian eng ropuina mah ka la tawng lo a, coach naupang tak mai ka ni. Chutihrualin tun dinhmun thleng tur hian lehkhabu aṭanga inzir chhuak satliah kan ni lo a, kan tawnhriat neih tawh ten tun hun hi min thlen a ni," tiin harsatna leh buaina kara a hun tawn tawh ten an chher hriam thu a sawi.

AC Milan hian hliam vangin Andrea Conti, Luca Antonelli leh Ignazio Abate te an chhawr thei dawn lo a, kum 19 mi goalkeeper Gianluigi Donnarumma chu mipui hmuh duh leh hmuh chak a ni leh ang.

Nipui bazar hun lai khan Milan hian player thar lakluh nan pound maktaduai 200 vel zet an hmang a, player 10 chuang an lak zingah champion lai Juventus aṭangin Leonardo Bonucci a tel–Italy defender tawnhriat hi an ṭangkai pui ang.

Kar tawp khan Fiorentina captain Davide Astori a thih avangin Pathianni zana inkhel tur zawng zawng chu sawn a ni a, Milan leh Inter Milan ten derby match hautak an khelh tur chu ṭhulh rih a ni. Milan hian Arsenal aiin hahchawlhna hun an nei hnem zawk a, an khelmuala khel tur an nih bawk avangin chak tura rinkai zawk an ni.

Chak mamawh Gunners
Kum 2018 bikah Arsenal-in match 13 khel tawhin vawi riat ngawt an tlawm! Arsene Wenger-a naute hi Premier League-ah parukna an ni mek a, an match hnuhnung berah kai thar Brighton an hneh lo.

League aṭang chuan Arsenal hian season tharah Champions League an khelh phak a rinawm tawh lo. Europe club-te tana inelna san ber UCL khel thei tura an kawng neih ṭhat ber chu Europa League nomawi chawi hi a ni. Mahse, Gunners kawng hi a awlsam dawn lo, Milan khelmuala goal chuah tlem chu an thil tum hmasak tur a ni ang.

Gunners tan Borussia Dortmund aṭanga lakluh Pierre-Emerick Aubameyang a inlan thei dawn lo. Gabon international inlan theih loh chhan hi Bundesliga club tan season tir lama Europa League-a a inlan vang a ni.

Khup hliam vangin Alexandre Lacazette leh defender Nacho Monreal chu hnungzâng na vangin a chhawr thei dawn lo bawk.

Wenger-a'n tlarhmaah duhthlan tur a nei mumal lo, kum 27 mi Danny Welbeck chu rinrawl a ni ang. England international Welbeck hian tun season inelna hrang hrangah match 28 khelin goal nga chiah a la khung–match ruk chhung goal chhuah lo Milan lakah Welbeck hna a awlsam dawn lo.

Arsenal dinhmun chhiat lai a ni a, chutihrualin beisei nei lo tawp an ni bik lo. Kum 2008 khan San Siro-ah Champions League nomawi kawltu Milan hi 2-0 in an lo va luhchhuah tawh a, Milan hi last 16 aṭangin an pet chhuak–thawnthu hlui thlen nawntir an tum ang.

Amaherawhchu, 2012 UCL-ah khan an intawng nawn leh. Milan hian an khelmualah 4-0 in hnehna an chang a, khualmualah si thum faiin tlawm zui mah se Italian club an tlang. Club pahnihte hi vawi ruk an intawng tawh a, vawi hnih ve ve hnehna changin ṭum hnih dang chu an inhnehtawk thung.