Golovkin vs Alvarez ṭhulh dawn lo

May 5-a Gennady Golovkin leh Saul 'Canelo' Alvarez inhnek tur inbuatsaih naah Canelo-a drug test an neih ṭumin clenbuterol hmuh ni mah se boxer pahnih inhmachhawn tur hi ruahman sa anga kaltlangpui a ni dawn.

Alvarez-a te lam chuan a taksaa intihchakna an hmuh hi, "Tun hnaia Mexican infiammi te nasa taka tibuaitu sa (meat) tih chingpen vanga thleng niin a lang," tiin an boxer 'sa' ei chu an puh. Alvarez hian Mexico aṭangin USA lamah a training camp a sawn nghal ang.

Clenbuterol hi asthma enkawl nan hman a ni ṭhin a, hetihrual hian thau ti tlem thei leh ruhrel tihlenna ṭha tak a ni tel bawk. Alvarez chuan, "Infiammi ka nihna angin infiamna hi ka ngaihluin ka zah em em a, ka chunga thil thleng ngai lo lo thleng ta hian min ṭhawng hle.

"Tih tur ṭul zawng zawng chu ka ti vek ang a, a tawpah chuan ka dikna hi hmuhchhuah a nih ngei ka beisei," tiin tum reng vanga clenbuterol chu ei tel a nih loh thu a sawi.

Alvarez hi Kazakh boxer Golovkin nen an intawn hmasakin chak zawk awm loin result hi puan a ni a, boxer pahnih bakah anmahni ṭantute an lungawi theih loh avangin inhnek nawn turin ruahmanna kalpui a ni ta a ni.

Kum 35 mi Golovkin hian Alvarez nena Las Vegas khawpuia an inhnek tur atan hian a kawnghren kawl lai WBA, WBC leh IBF title-te chu inchuh turin a hlan ang.