Tri series-ah India tlawm nghal

India, Bangladesh leh Sri Lanka te inelna Twenty20 tri series Nidahas Trophy-a match hmasa ber chu Thawhlehni zan khan khelh a ni a, India chuan a thlengtu Sri Lanka chu wicket ngain an hneh lo nghal.

Mikhual team India an bat hmasa a, Shikhar Dhawan-a'n run 90 ngawt vaw chhuak mah se run 37 siamtu Manish Pandey tih loh chu Dhawan-a'n puitu a nei ṭha tawk lo a, opener leh captain ni bawk Rohit Sharma phei chu run siam loin a out!

Men in Blue hian over 20-ah run 174 tlinin wicket nga an hloh a, Dhawan awm lo se India an mualpho hle ang.

Sri Lanka bat hun a thleng a, run 66 siam tu Kusal Perera che ṭha mah se batsman dang zingah run 30 tlin thei pawh an awm bik lo–mah se Dasun Shanaka (15 runs) leh Thisara Perera (22) te a tawp thleng an rawn dam avangin over 18.3-ah an target umphain hnehna an chang.

Nidahas Trophy-a tel India, Sri Lanka leh Bangladesh te hi vawi hnih ṭheuh an inkhel kual chhuak ang a, a sang pahnihin series nomawi chawi tumin final an khel ang.

India hian zanin dar 7:00-ah match hnihna an khel lehnghal dawn a, Bangladesh nen an inhmachhawn ve tawh dawn thung.