Minerva Punjab an champion
I League-ah thilmak a thleng nawn a, season ṭan hmaa champion rinkai ni pha lo Minerva Punjab chuan nimin tlai khan Churchill Brothers chu 1-0 a hnehin chenna ngai loh ram an thleng.
Minerva-in Goan club an hneh avangin inkhel dang pahnih result-in nomawi chawi tur a hril lo. Salt Lake Stadium-ah East Bengal leh Neroca te 1-1 in an inhnehtawk a, hetiang zat bawk hian EMS Stadium-ah Mohun Bagan leh Gokulam Kerala te an inhnehtawk bawk.
A hriat hma!
Punjab club-in minute 15-na lekah William Opoku hmangin Churchill Brothers lamah goal an khung a, Minerva tan champion turin Ghanaian midfielder hmanga an goal khung humhim a tawk.
Goan club-in I League khel zel tura chak an mamawh avangin second half-ah an nawr a, goal erawh an hlawh chhuak lo. Punjab-in point thum hlu bik an hlawh chhuak a, I League champion an ni.
Minerva hi 2015-16 season khan I League Second Division-ah pahnihna an ni a, champion Dempo club an inhnuhdawh zarah I League an khelh theih phah. Season liam taa Aizawl FC-in I League nomawi an chawi ṭum khan pakuana an ni a, kuminah Khogen Singh kaihhruaina hnuaiah table chung berah an awm.
Kolkata club an zuzi
I League season ṭan hmaa champion tura rinkai pahnih East Bengal-in an mualah Neroca an draw hram. Manipur club-in Odili Felix Chidi hmangin goal an khung hmasa a, Red and Gold tan Lalramchullova siam sak chu Dudu Omagbemi-a'n siphurh sut nan hmangin goal dang a luh belh lo.
Mohun Bagan-in Asier Dipanda Dicka hmangin I League kai thar Gokulam Kerala lakah hma hruai mah se Henry Kisekka-a'n mualneitu tan a sut a, 1-1 thoin inkhel a tawp.
Minerva chetsual chang Kolkata club pahnihin season tawp niah beisei an phak lo a, an result-ah hian Red and Gold leh Mariners thuneitute an lawm lo ang. East Bengal hian a vawi khat nan I League nomawi chawi an inbeisei a, champion turin match hnuhnung pahnihah point ruk hlawhchhuah tawk mah se point hnih bak an hlawh chhuak lo a, Aizawl FC champion puitu Khalid Jamil a ropui nawn lo.
Super Cup-ah Lajong
I League zawh rualin Super Cup khel tur a hriat nghal a, Gokulam Kerala an chak zawh loh avangin Shillong Lajong chu paruknaah awmin playoff khelh ngai loin an inlan thei dawn.
Season tawpa I League club leh Indian Super League club-te inelna turah hian NorthEast club pathum Aizawl FC, Neroca leh Shillong Lajong te an inlan vek dawn a, champion Minerva Punjab bakah Kokata club Mohun Bagan leh East Bengal te an inlan bawk ang.
Table hnuai lama awm Gokulam, Chennai City, Churchill Brothers leh Indian Arrows ten hmun ruak pahnih an inchuh ang.