Zanin dar 8:00-ah 'Bye Bye Inkhel'

Hawla Indoor Stadium-ah zanin dar 8:00 hian Tuikual South leh Mission Veng Vikings ten Mizoram Super League Season 4 semifinal game 2 an khel dawn. Tuikual South mipuiin game 1-ah Mission Veng an 'bye bye' tawh a, game 2-ah tihnawn leh sak an duh ang.

Mission Veng lamin season liam taa champion puitu Ronald March an chah thleng thei lo a, TKS tan lawmna tham a tling a, chutihrualin hriat tel ṭul erawh game 1-a Tuikual South chakna zat hi 60-59 a ni a, an inthlauhna chu point khat chauh a ni.

TKS coach KC Lalliantluanga chuan, "Game 1-ah chuan hnehna kan chang ngei a, kan dinhmun ṭhat zawkna erawh ka la hmu thiam lo. Game 2-ah kan chak ngei ngei a la ngai a, ani hi champion lai an nih avangin awlsam taka hneh theih an ni lo," tiin Vanglaini a hrilh.

Coach KC-a tan ṭawng huai theih a la ni lo, a chhan chu league round-ah Vikings hian TKS hi 64-59 in an hneh. American player March-a tel lo champin lai Vikings an ṭha a, tawnhriat an nei ṭha tawh bawk.

Mission Veng Vikings coach H. Lalhruaitluanga chuan, "MSL3-a kan champion ṭum khan final game 1-ah kan chak lo a, kan tho chhuak leh thei a. Tun hunah pawh hian kan tawnhriat hi hman ṭangkai kan tum ang," tiin final thlen beiseina a la nei sang hle.

Team pahnih an intluk tawk tih chu an intawn tawhna match hnihah a chiang a, mipuiin dang­lam­na an thlen thei ang. Tuikual South mipui hi MSL-a au thiam ber zinga mi an ni a, an hla pui 'Pheng­phehlepṭial mawite' mawi thamin an sa thei a, Mission Veng hian nomawi an chawi ṭum chuan TKS ai hian ṭantu an la ngah zawk. Zaninah pawh hian entu mipui aṭang­in chak duh zawk chu a hriat ang.