India tan Siami goal a tawk lo
South Korea-a tour nei mek India hmeichhe hockey team chuan nimin khan an match thumna an khel a, India tan Lalremsiami chuan goal khat khung mah se 2-1 in an chak lo.
Seoul, Korea-a inkhelah mualneitu lamin bul an ṭan fuh a, quarter hmasa berah Ki Cheon (12') leh Yurim Lee (14') te hmangin goal an khung nghal - India tan Kolasib nula Siami'n minute 16-naah a sut ṭhen a, goal dang a lut zui tawh lo.
India leh Korea te hian match nga an khel dawn, an match hmasa pahnihah India hian hnehna an chang. An match hmasa berah Siami goal hmangin si khat faiin hnehna an chang a, a vawi hnih naah 3-2 in hnehna an chang leh bawk; vawiin chawhma dar 11:00 hian an match lina an khel leh ang.
Women's Asia Cup 2017 champion India nulate hian tun hnaiah hma an sawn chho hle a, April-ah Commonwealth Games an khel dawn a, Korea tour an neih hi CWG atana inpuahchahna a ni.