Kum 29 hnuah Barca tan English player inlan

English rawlthar duhawm Marcus McGuane chuan Catalan Super Cup-ah Barcelona tan a match hmasa ber a khel a, kum 29 kal taa Gary Lineker hnua English player Barca tana inlan leh thei hmasa ber a ni.

Arsenal midfielder hlui McGuane hian minute 77-naah Aleix Vidal a thlak a, hun pangngaiah goal khung loa an inhnehtawk hnuin Barca hi penalty-ah 4-2 in an chak.

McGuane hma hian Lineker chuan kum 1986 khan Everton aṭangin Barcelona hi a zawm a, season thum a khelh chhungin match 137 a khelh sakah goal 52 a khung. England legend chuan, "Hlawhtlinna tam tak chang turin ka duhsak e," tiin duhsakna a hlan.

Arsenal Youth Academy chhuak McGuane hian Arsenal-ah kum 10 chuang inkhelh a zir hnuin January khan Barcelona reserve team a zawm a ni.

Catalan Super Cup hi Catalonia huam chhunga La Liga club, season hman zawh taka league table lama ti ṭha pahnihin an khelh ṭhin niin 2014-ah khan khelh ṭan a ni a, kum hnih danah khelh ṭhin a ni.

Barcelona hian 2014-ah khan he nomawi hi chawiin 2016-ah Espanyol-in an chawi ve leh thung a, 2020-ah khelh leh tur a ni ang.