Pune khelmualah goal a lut lo
Indian Super League semifinal first leg match hmasa zawk chu Nilaini zan khan khelh a ni a, Pune City khelmualah Bengaluru FC-in goal an khung loh avangin 0-0 in an inhnehtawk.
ISL season thum lo khelh tawhah away goal rule hman ni ngai lo mah se tun season aṭangin away goal hlutna chhiar ṭan a ni–khualmuala goal khung lo Bengaluru FC aiin Pune City dinhmun a ṭha zawk tihna a ni.
Pune City tan Isaac Vanmalsawma a inlan a, Hnahthial tlangval hian Bengaluru goal ruakah pet luhna remchang nei mah se a hming chher nan a hmang thei lo.
Inkhel chu
Team pahnih an inngam tawk a, chance hmasa ber erawh minute 30 hnuah kan hmu chauh–South Indian club-in freekick an hmu a, a pet turin Sunil Chhetri a lo pen chhuak. India captain hian ṭha zetin pet mah se Pune goalkeeper ṭhangduang Vishal Kaith-a'n a dang ṭha hle.
Pune City tan Ashique Kuruniyan-a'n chance neih chhunzawm ve zat mah se Maharashtra club-in goal an khung thei bik lo a, first half inkhel boruak nung lo takah chance dang awm loin an ṭin.
Chawlhlawk hman a nih hnuah Chhetri leh Juanan ten BFC tan chance neih chhunzawm mah se Boithang Haokip hnen aṭanga an ball hmuhah player pahnih an inring thul a, net ruakah an tauh goal lo.
Mizo tlangval Isaac
Isaac-a'n Pune tan inkhel bul ṭan lo mah se minute 56-naah Mizo rawlthar tlan luhtir a ni a, Shillong Lajong midfielder hlui hian goal erawh a keng tel lo.
Marcelinho-a'n Mizo tlangval tan hian goal khungna chance duhawm tak a siamsak a, mah se goal hmaah Isaac a talbuai a, game boruak sangah Hnahthial rawlthar a talbuai.
Bengaluru tan Subhasish Bose-a'n chance nei ve leh mah se Kaith buaina tham a thlen lo a, first half boruak tluk zetin second half pawh a nung chuang lo–goal lut loin team pahnih an ṭin.
Final beiseitu Roca
Bengaluru coach Albert Roca chuan, "Kan result-ah chi aina tur ka hmu lo a, hlim taka lawm chi erawh a ni chuang lo," tiin chak zo lo mah se khualmuala draw result hlawhchhuah chu chhe lutukah a ngai lo.
Barcelona assistant coach hlui chuan sawi zawmin, "Tunah chuan kan mualah kan khelh a hun ve dawn ta. Pune khan team ṭha tak, tlarhnung leh tlarhma lama player nei ṭha an nihzia an pholang a, team thawkho ṭha tak an ni.
"Mahse, final lut turin chance duhawm tak kan nei a, engkim hi kan kutah a la awm vek. Kan nauten season tluana an khelh anga an khelh a ṭul dawn a ni," tiin league hmahruaitu nichunga semifinal an luh theih dan chu chhawm nun a ṭul thu a sawi.
Popovic a lawm
Pune City coach Ranko Popovic chuan, "Ka naute khelh danah ka lawm a, result-ah erawh ka lawm lo. Zaninah khan chak ngei tumin kan khel a, theihtawp kan chhuah a ni," a ti.
J League lama hming lo chher tawh coach chuan dinhmun ṭha zawk an nih chuan loh thu sawiin, 'Hnehna chang ni ila dinhmun ṭha zawk kan ni ang. Mahse, zaninah erawh chak zawk awm loin game kan khar a ni. Bengaluru-ah goal khung tumin kan khel dawn a, a harsa dawn tih ka hria.
"Mahse, final khelh kan duh chuan Bengaluru-ah kan khelh ṭhat a ṭul dawn a, team kan nihna ang chiaha khel chhuaka final-a luh kan tum a ṭul a ni," tiin a sawi.