Etihad Stadium-ah City chak lo

Manchester City chu an mual Etihad Stadium-ah kum 2016 hnua a vawi khat nan an khingpui lakah an tlawm. Nilaini zan khan Pep Guardiola hote hian Basel chu 2-1 in an hneh lo a, khualmuala 4-0 a hnehna an chan tawh avangin Champions League quarterfinal an thleng.

Mikhual tlangnel
City tan Gabriel Jesus chuan minute 8-na lekah a khung a, Brazilian forward hian Bernardo Silva siam sak chu goal-ah a chantir.

Amaherawhchu Basel-in minute 17-naah Mohamed Elyounoussi hmangin an sut a, second half-ah pawh mikhual bawkin an khung. Minute 71-naah Elyounoussi siam sak chu Michael Lang-a'n chakna goal ni turin a khung.

Basel hi...
Basel hian Swiss football an thunun ṭhin a, season riat chhung chu an champion tawh. Tun season-ah erawh league-ah pahnihnaah awmin hmahruaitu Young Boys chu point 14-in an pha lo a, Swiss Cup-ah Young Boys an hneh loh avangin semifinal aṭangin an tla bawk.

Basel boss Raphael Wicky chuan City laka an thawhleh theih a inbeisei lo hrim hrim thu inkhelh banah a sawi a, Pep Guardiola hote fak zuiin, "Manchester City hi tun dinhmunah chuan khawvela club ṭha pahnih emaw pathum zingah an tel pha a ni," a ti.

An nawr nep!
English club hian Premier League record siamin Chelsea an hmachhawn ṭumin vawi 902 zet ball an inpe dik a, ni thum hnua Basel an hmachhawn ṭum hian vawi 978 zet ball in pass dikin Champions League record thar an siam.

Amaherawhchu City hian an khingpui aiin goal an khung tlem a, goal zawnah pawh team pahnih hian vawi thum ve ve chauh an pet.

Pep Guardiola chuan, "First half chu a ṭha thawkhat a, second half-ah erawh goal nawr dan kan theihnghilh a ni. Tum nei loa ball inpek kual hian awmzia a nei lo a, football mawina a pholang lo," tiin an khelh danah a lungawi lo.

Spanish boss Pep-a chuan a naute chhanzuiin, "First leg-ah 4-0 a ni tawh a, second leg tha tho taka khelh chu a har tawh a ni," a ti a, City hian an player pawimawh Kevin de Bruyne, Sergio Aguero, Nicholas Otamendi leh Kyle Walker te chu hahdamna hun an siam sak.

City hian hnehna chang lo mah se FIFA Under 17 World Cup-a best player Phil Foden khelh danah lawmna tur a awm a, kum 17 mi midfielder hi English player zinga Champions League knockout stage khel thei naupang ber a ni.

Manchester City tan an club history-a Europe inelna sang bera quarterfinal an thlen vawi hnihna chauh a ni a, tun season-ah hian Juventus, Real Madrid leh Liverpool te chu a sang pariatah hian an inhlangkai tawh bawk. Pep-a hote hian March 12 zan hian Stoke City hmachhawn turin Britannia Stadium an tlawh ang.