Spurs veltu Argentine striker

Beiseina a awm a, chu beiseina chu a san zual vanglai takin vuak chhiatin a awm. Tottenham Hotspur-in Champions League quarterfinal luh an beiseina chu Juventus lakah a tawp. Argentine manager Mauricio Pochettino veltu chu a hnampui Gonzalo Higuain leh Paulo Dybala te an ni.

Wembley Stadium-ah Juventus-in goal an phurh hmasak hnuah 2-1 in hnehna an chang let thei a, inkhel hmasa nena belhkhawmin 4-3 in hnehna an chang. Italian club ropui hian tun hnai kum li chhunga a vawi thum nan UCL quarterfinal an lut.

Spurs hian 2010-11 khan Champions League quarterfinal an khel tawh a, chumi hnuah an la thleng sang leh lo. Tun hnai inelna hrang hrangah match 18 hnua an chak lohna hmasa ber a ni a, hnehna changtu Old Lady erawh match 22 chhung hneh loh nei loin an kaltluang ta thung.

Beiseina
Juventus Stadium-ah goal hnih an phurh hnuin Tottenham an tho leh thei. Nilaini zan second leg inkhelah erawh Spurs lamin bul an ṭan fuh zawk a, dinhmun duhawmah an awm hman.

Son Heung-min leh Dele Alli ten goal khung theihna hun ṭha an nei. Mahse, Juventus goal vengtu kha Gianluigi Buffon a nih avangin awlsam taka paltlang theih a ni lo, striker rinrawl leh hriam ber Harry Kane pawh a vannei zo bik lo.

England international Kane hian Juve defender leh Buffon a paltlang tawh hnuah goal zawnah a pet lo! Tottenham defender Jan Vertonghen-a'n Douglas Costa a tih tluk avanga penalty a chawi lo chu a vannei hle.

Chawlhlawk hmain minute ruk chiah a awm tawh tihah Spurs dan reng theih an ni lo, Juve defender ten Kieran Trippier ball cross an dan loh chu vengtu nei lo Son-a'n harsatna nei loin a khung.

Minute thum
Khualmualah goal hnih an khung a, Wembley-ah goal khata hma an hruai zui leh theih avangin Tottenham dinhmun a ṭha takzet tawh. Mahse, an khingpui hi Massimiliano Allegri enkawl Juventus an ni a, last 16 inkhel a la tawp lo.

Kar tawp Serie A inkhela Lazio an hnehna goal awmchhun khungtu Dybala-a'n

box chhungah remchang tawng fuh mah se goal zawnah a hlap lo. Juve-in an nawr chhunzawm, minute 64-naah Sami Khedira ball tauh chu Higuain-a'n hnai tak aṭangin a kheng lut.

Argentina international Higuain-a'n rang taka ball lain center-ah a dah zui nghal, khualmualah chak an duh tih a chiang. Real Madrid striker hlui hian ram tana a khelh pui Dybala tan through ball ṭha bik pe zuiin, goal hmasa an khung aṭanga minute thum hnuah Dybala a inlar zui.

Kum 24 mi Dybala hi Tottenham defender pathum ding tlar zing aṭanga rawn put chhuakin, keeper Hugo Lloris rawn tlan chhuak dan hman lohin a thlawh lut. Argentine striker Higuain leh Dybala goal khung inkar hi minute thum chiah a ni, tawnhriat nei tlem zawk Spurs tan a pawi zo ta.

Spurs tan a na
Real Madrid, Manchester United, Liverpool leh Borussia Dortmund an hnehna khelmualah Tottenham-in an goal neih an hum thei lo. Turin-ah team puitling an nihzia lantir nan ropui takin tho chhuak thei mah se hun pawimawhah an tawnhriat neih tlem a lang chhuak a, an tuar zui bawk.

Tottenham manager Pochettino an tihsual vanga chak lo an nih thu sawiin, "Minute thum pawh tling mang loah vawi hnih tihsual kan nei, kan tihsual lian tak pahnih avangin kan tla.

"Chutihrualin inkhel pahnih kha kan thlir kir a nih chuan goal tam zawk khung kan phu a, team ṭha zawk kan ni. Mahse, football-a hnehna chang tur chuan kan khingpuite aia goal khung hnem zawk a ngai, goal khatna kan chhuah hma kha chuan football ropui tak kan khel a ni," tiin a naute a chhuan thu a sawi.

Buffon tan
Juventus legend Buffon-a'n tun hma deuh khan Champions League nomawi an chawi lo a nih chuan inkhelh a chawlhsan tur thu a sawi lawk tawh. Juve goalkeeper ropui hian a duhthusam a thlen dik theih nan a hna a thawk ṭha hle, a hmaa ding defender Giorgio Chiellini chu Spurs tlarhma ho dahṭhatu pawimawh a ni bawk.

Juve manager Massimiliano Allegri chuan, "Dawhthei takin kan nghak a, tun hnai kum thum chhung vel ngawrh taka kan zir chu a takin a chhanna kan hmuin ka hria. Stadium ropui tak Wembley-ah hun chanve hmalam kha chu kan talbuai, ball kan hloh hnem avangin kan dinhmun pawh a chhe hman hle.

"Mahse, a hunah tak player ṭha leh pawimawh an inlar a, Higuain kha chawlh kar hnih hnuah a rawn kir a, Dybala pawh a hliam dam hnuah a match hnihna chiah a ni, chutichung pawha khatiang tak kan khel theih avangin ka naute khan round sang zawk luh an phu," tiin a sawi.