Old Trafford-ah Liverpool Tu nge ropui zawk dawn?
English football-a team inhal sawi a nih apiangin Manchester United leh Liverpool hming sawi a ni ṭhin - zanin dar 6:00-ah team pahnih an inhmachhawn dawn a, an inkhelhna tur hmun hi Old Trafford-a ni.
United-in Jose Mourinho enkawlna hnuaiah defensive game an khel tlangpui a, Liverpool-in Jurgen Klopp hnuaiah attacking game an khel thung - khelh dan inang lo, team ṭha ve ve, tun hnaia khel ṭha tluang an intawng dawn a, a hmuhnawm loh ring suh.
Tun season-ah Anfield-a team pahnih intawn hmasak ṭumin goal khung loin an inhnehtawk a, player langsar ber chu David de Gea a ni - United fan-ten De Gea aiah Romelu Lukaku chu langsar zawk turin an duh ngei ang a, Liverpool-in Mohamed Salah goal khung lai hmuh an tum thung ang.
Inkhel pangngai?
Champions League last 16 second leg-ah Liverpool-in Porto an mikhual dawnin Jurgen Klopp-a'n, "Manchester United ngaihtuah chungin squad ka rem dawn lo a, kan ṭhat dan berin kan khel ang. United nena kan inkhel tur hi inkhel dang nen a inang reng," tiin a sawi a, a team rem dan erawh United khel tura inkhêk an nih tih hai rual a ni lo.
Klopp hian 5-0 a an hneh tawh Porto lakah Salah chu bench-ah a dah a, Sadio Mane leh Roberto Firmino chu inkhel bul ṭantir ni mah se second half-ah lakchhuah an ni.
German coach-in a rilruah Old Trafford-a an len tur a ngaihtuah tel reng tih a chiang a, champion beiseiawm tawh lo mah se point hnih chiaha an phak loh pahnihna ni mek United lehthal hi an chak ang.
Lukaku = 100?
Red Devils striker Lukaku-a'n Premier League-ah goal 99 a khung tawh a, zaninah Liverpool lakah a khung thei a nih chuan Premier League-ah goal 100 a khung tling dawn tihna a ni.
Liverpool ṭhenawm hmelma Everton-a hming chher, United 'ta' ni ta Lukaku tan tun hi mellung phunna hun duhawm chu a ni - Old Trafford-a a match hnuhnung pali-ah goal a khung vek a, Reds lakah hun duhawm a nei dawn.
Anfield-a team pahnih intawn ṭumin Mourinho chu 'bus park' tiin a defensive game vangin sawisel a ni a, mahse Portuguese manager hian Anfield-a point khat hlawhchhuah chu result ṭha tawkah a ngai. Old Trafford-ah erawh point thum aia tlemah a lungawi dawn lo tih a chiang a, tun season-a match khat chiah an la tlawmna khelmualah chak duhna nen an khel ang.
Thawnthu hlui chu
Manchester United leh Liverpool intawn tawhna match 170 kan keu let dawn a nih chuan Merseyside club chungah Red Devils an leng. United hian match 67 hnehna an chan laiin, Liverpool-in vawi 55 chiah hnehna an chang a, an intawn hnuhnung pali-ah chak zawk awm loin an inhnehtawk.
Team pahnih inkhel boruak a sang ṭhin tih tichiangtu chu Premier League-a an intawnah vawi 16 lai red card phawrh a ni tawh. Merseyside derby (21)-ah chiah red card phawrh tam zawk a ni. Zaninah 'card' kan hmu nual a nih pawhin thil mak a ni lo ang.
January 2006 khan Rio Ferdinand tauh luh hmangin United-in minute tawp rualin Liverpool an hneh a, Gary Neville-a'n United logo fawp chungin Reds fans lam hawiin a lawm - £10,000 chawitir a ni. Kum 2016-a Jamie Carragher-a'n hemi chungchang a zawhin Neville hian, "Match 120 hrem phu lawmna a ni," tiin a chhang a, hei hian United leh Liverpool inhuatna thui takin a hrilhfiah.
Hei le Liverpool
United defender hlui Rio Ferdinand-a'n, "Eng team mahin Champions League quarterfinal-a Liverpool hmachhawn an duh lo ang," tiin an hmelma club a fak a, Rio meuh hetianga a ṭawngchhuah chuan Liverpool hi an ṭha tawk tihna a ni.
Liverpool hian an league match hnuhnung 10-a point 30 hmuh theih aṭangin point 20 an hlawh chhuak a, an league match hnuhnung 20-ah vawi khat chiah an tlawm. United tana hriat tel ngei tur chu Liverpool hian league bikah khualmualah goal 34 an khung tawh. Lyon nen European top five league-a khualmuala goal khung hnem ber an ni.
Reds tan league match nga chhung a zawna goal khunga goal 24 khung tawhtu Mohamed Salah, inelna hrang hranga goal 22 khung tawh Roberto Firmino, a match hnuhnung pali aṭanga goal nga khungtu Sadio Mane te chu tlarhmaah inchhuanna tur an ni leh dawn - Old Trafford vel turin an ṭha tawk.