Vawiinah Federer inlan dawn

Roger Federer chuan vawiin chawhma dar 11:30 hian Indian Wells Masters-a a match hmasa ber a khel dawn a, world number 1 Federer hian seeded chang phak lo Federico Delbonis a hmachhawn ang.

Kum 36 mi Federer hian Grand Slam nomawi 20 zet chawi tawh mah se, title dang lak duha a la tuihal reng thu a sawi. Swiss star hian ATP Tour chu a ngaihpawimawh a nih thu a sawi bawk.

Federer chuan, "Ka hriselna dinhmun a ṭha a, ṭum dang aiin ka lakah beiseina pawh a sang dawn tih ka hria. Inelna ka hmachhawn a nih chuan match hmasa bera chak loh nghal ka duh ngai lo, a sang thei ang ber thlen leh ka tum ang," tiin a sawi.

World number 1 ni thei upa ber Federer bakah hian Novak Djokovic a inlan dawn bawk a, player ropui pahnihte hi an chak chho zel a nih pawhin final hma chuan an intawng thei dawn lo.

Payer langsar leh ṭha tak tak an inlan dawn rual hian, world number 2 Rafael Nadal, Andy Murray leh Stan Wawrinka te erawh hliam vangin an inlan thei dawn lo thung.