Kane aia hlu Salah?

Premier League-ah Manchester City an cham­pion dawn ngei niin a lang tawh a, chutih rualin Golden Boot dawng tur a la chiang lo hle. Tottenham striker rinrawl Harry Kane leh Liverpool duhlai Mo­hamed Salah ten goal 24 ve ve an khung tawh.

AS Roma aṭanga Reds pantu Salah hian assist vawi riat a nei tel tawh a, goal 24 khung turin minute 2,213 bak a mamawh lo. Lawmman dawng tura a elpui Kane-a'n minute 2,408 a hmang thung a, a ṭhiante goal khung tur vawi hnih chiah a la siamsak thung.

Tottenham hian Pa­thianni zanah Bour­ne­mouth an lenchilh dawn a, Champions League aṭang­a tla hlim Spurs hian an boruak siamṭhat nan hman an duh dawn - Kane-a'n goal a khung belh a nih pawhin a mak lo ang. Hetih lai hian Salah erawhin tun season-a goal chhuah tlem ber pahnihna Manchester United a hma­chhawn dawn thung.

Goal khung tam te
Harry Kane Tottenham 24
Mohammed Salah Liverpool 24
Sergio Aguero Man City 21
Raheem Sterling Man City 15
Romelu Lukaku Man Utd 14
Roberto Firmino Liverpool 13
Jamie Vardy Leicester 13