Zaha-a'n Chelsea hmachhawn dawn?

Zanin dar 11:30 hian Premier League champion Chelsea chuan Crystal Palace an mikhual dawn a, table mawng lama talbuai mek Palace tan Wilfried Zaha a inlan theih beisei a ni.

Ivory Coast international Zaha hi a khup hliam vangin thla khat chhung vel a inkhel thei tawh lo a. Crystal Palace hian kum 25 mi Zaha tel loa league match vawi kua an khelhah an chak lo vek a, a tel thei a nih chuan manager Roy Hodgson tan chanchin lawmawm a ni ang.

Manchester City hneh lotu Chelsea hi tun dinhmunah pangana an ni mek a, palina London club Spurs aiin point ngaiin an hniam zawk. Antonio Conte naute tan season thara Champions League khel phak turin kawng a awlsam tawh lo.

Blues hian kar lehah Champions League khel turin Barcelona an lenchilh zui dawn a, league-a hnehna chan mamawh bawk an nih avangin Conte tan player siksawi thiam a pawimawh ang.

Italian manager Conte-a'n tun hnaiah a striker pahnih Olivier Giroud leh Alvaro Morata te chungah rinna a nghat ngam meuh lo a, City an hneh loh ṭum pawhin Eden Hazard chu tlarhmaah dah a ni. Goal khung kawnga Chelsea buaina chingfel tur chuan Arsenal leh Real Madrid striker hluite hian an hna an thawh ṭhat a pawimawh tawh ang.