Milan hnehtu Arsenal dinhmun a tha

Arsenal-in Italian club hlun AC Milan khelmualah si hnih faia hnehna an chan avangin Europa League quarterfinal an luh a beiseiawm ta hle. Last 16 first leg inkhel dangah Atletico Madrid chuan a mikhual Lokomotiv Moscow lakah 3-0 in hnehna an chang bawk.

Inrintawkna nei tlem tak chungin Arsene Wenger-a nauten San Siro an pan a, first half-a Henrikh Mkhitaryan leh Aaron Ramsey te goal hmangin 2-0 in an chak a, a zawna match li a tlawm hnuah chak ni hmel an hmu ve leh ta.

Karleh Ningani zan hian Emirates Stadium-ah second leg khelh a ni dawn, chumi hmain Arsenal hian Pathianni zan dar 7:00-ah Watford an lenchilh dawn a; Milan hian dar 10:30-ah Genoa an tlawh ve bawk ang.

Goal hnih chu
Striker manto ber Pierre-Emerick Aubameyang leh Alexandre Lacazette te an chhawr theih loh zanah Arsenal tan Mkhitaryan a inlan. Armenia captain hian box chhungah ball dawngin Milan defender Leonardo Bonucci a paltlang hnuah Gunners tana a goal hmasa ber a hlap lut.

Arsene Wenger-a'n a sawi lawk ang ngeiin a nauten theihtawp an chhuah a, chawlhlawk hma hretin an goal hnihna an khung. Mesut Ozil-a ball pass ṭha bik dawngtu Ramsey chuan keeper Gianluigi Donnarumma thlenga a bum hnuah goal a khung.

Milan hi si hnih an phurh hnuah an harh chauh, midfielder Giacomo Bonaventura-a'n hun ṭha nei ve mah se goal bar chungah a thlawh liam a, ball an chan tam hnuah Arsenal tlarhnung an su hawng zo chuang lo.

Wenger Out?
Premier League-ah beisei an phak lo a, Arsenal hi FA Cup aṭanga an tlak hnuah League Cup final-ah an chak lo bawk. Europa League an khelh hma hian Arsenal Supporters' Trust's (AST) chuan an manager chu a hna ngai chelh zel tura an duh leh duh loh chungchang-ah vote an la.

Vote thlaktu 1,000 zinga 88% zet chuan season tawp rualin Wenger hi chhuak turin an duh, hetiang boruak rip tak hnuaiah hian fans 2,000 chuan inkhel en turin Italy an pan tho.

Rinhlelhna karah Danny Welbeck, Ozil, Mkhitaryan leh Ramsey ten Milan tlarhnung an rum ṭhaih fo a, tlarhnung laia awm Laurent Koscielny chuan rintlaka nihzia a lantir bawk - hnehna hlado chham chungin London an pan; Wenger hian Europa League nomawi a chawi a nih chuan fans tam takin an ngaihdan an thlak leh ngeiin a rinawm hle.

Gunners manager Wenger chuan, "A pawimawh ber chu hnehna kan chang kha a ni, mah se quarterfinal kan lut ta tihna erawh a la ni bik lo. Hun harsa tak karah nghet taka kan tlarhnung an ding khawng tluan thei kha a lawmawm hle," tiin a sawi.

Tihsual
AC Milan manager Gennaro Gattuso chuan an chak loh chhan chu tihsual an ngah vang a nih thu a sawi. Italian manager chuan, "Min nawr apiang khan goal khung thei tur khawpin an hlauhawm. Kan ṭangrual ṭha tawk lo a, Arsenal khan hnehna chan an phu a ni," tiin a sawi.

Stadium hmingthang San Siro-ah Milan ṭantu 70,000 pungkhawm mah se an player ten beisei an phak lo, a zawna match 13 chhung hnehna an chan tawh hnua an tlawmna hi a na khawp ang

Beisei an la neih thu sawiin Gattuso chuan, "Football-ah chuan thil theih loh a awm lo tih hriat a ṭha, London-ah ennawm thlir turin kan kal dawn lo a, hnehna chan tumin kan thawk chhuak dawn a ni," tiin a sawi.

Rinkai Atletico
Ningani zan inkhel dangah La Liga pahnihna nilai Atletico Madrid chuan Diego Costa, Saul Niguez leh Koke te goal hmangin, an mikhual Lokomotiv Moscow an sawp a, Russia-ah an chesual viau a nih ngawt loh chuan quarterfinal an lut ngei ang.

Atletico coach Diego Simeone chuan, "Inkhel pumpui thlir khan kan ṭha zawk. Costa-a'n min rawn zawm hnuah match 12 aṭangin goal ruk a khung leh ta a, goal khung lo mah se Antoine Griezmann chet dan kha hmuhhmaih theih a ni lo bawk," tiin tun hnaia a hmatawng che ṭha tak pahnihte a fak.

Austrian club Red Bull Salzburg chuan Kosovo international Valon Berisha goal hnih hmangin Borussia Dortmund chu an buzawlah 2-1 in an va luhchhuah. Bundesliga club goal neihchhun hi Andre Schurrle khung niin an hmabak a hautak tawh dawn hle.