ISL final khel tur a hriat dawn ta

Pathianni zan dar 8:00-ah Bengaluru FC leh Pune City an inkhel dawn a, tun season atana ISL final khel tur team pakhat a chiang dawn.

Pune khawpuiah team pahnih hian semifinal first leg lo khel tawhin goal khung loin an inhnehtawk a, away goal rule hman a nih tawh avangin Pune City dinhmun a ṭha zawkah ngaih a ni.

Zanin dar 8:00-ah FC Goa chuan Chennaiyin FC an mikhual dawn bawk a, anni erawh semifinal first leg chauh la niin Thawhlehni zanah second leg an la khel leh ang.

Thlirlet ila...
Pune khawpuia Bengaluru leh Stallions intawn hmasakah inkhel a hmuhnawm lo tih phat rual a ni lo a, team pahnih an fimkhur. Pathianni zana inkhel tur erawh second leg a nih tawh dawn avangin team pahnihin 'risk' an lak a ṭul dawn a, goal khung tumin an innawr nghal ang.

Bengaluru-in an khelmuala an khelh dawn avang ngawta thlamuang taka fan-te an lo awm ringawt a nih chuan an tisual ang–Bangalore club hi ISL league round match 18 an khelhah vawi li chiah an tlawm a, heng zinga match hnihah hian an tlawm.

League round-ah vawi khat an khingpui an inhnehtawkpui bawk a, anmahni mualah ngei Pathianni zana an hmachhawn tur Pune City nen 1-1 in an inhnehtawk. Pathianni zan inkhel hi 1-1 nen a hma angin tawp se chuan Pune hi tlang tur an ni–Bengaluru-in hei hi thlen tir an duh lo ang.

Goal nen Pune?
Pune City coach Ranko Popovic-a'n Bengaluru nen goal awm loa an inhnehtawk hnu lawkah Bangalore-ah chuan goal khung an tum tur thu a sawi a, Serbian coach chuan, "Final khel tur chuan goal kan khung ngei ngei a ngai a, awlsam dawn lo mah se kan tum dawn a ni," a ti.

Maharashtra club tan hian hliam vangin Lalchhuanmawia Fanai a inlan theih a la beiseiawm loh a, first leg-a bench aṭanga tlan luhtir Isaac Vanmalsawma erawh inlan thei tura beisei a ni.

Bengaluru coach Albert Roca-a'n, "Min ṭantute hmaa inkhel tur kan ni a, final lut turin kan tih theih zawng zawng chu kan ti ang," tiin an mualah tlawm a tum hmel loh hle–Spanish coach hian inkhel hmasa zawkah Lalthuammawia Ralte leh Zohmingliana Ralte te chu bench-ah a dah tluan.

Goa nge Chennai?
Indian Super League 2015-ah nomawi chawi turin Chennaiyin FC-in 3-2 in FC Goa an hneh a, Goan club hi referee thutluknaah lungawi loin buaina an siam hial–he thil thleng hi FC Goa-in an la theihnghilh lo a, phuba lak duhna thinlung nen Chennai club an mikhual ang.

Chennaiyin FC tan ISL season hmasa ber aṭanga an striker rinrawl ni tawh Jeje Lalpekhlua chu tlarhmaah an chhuanvawr a la ni reng a, Hnahthial tlanvgval hian match 17 a khelh tawhah goal sarih khungin Indian player zingah Sunil Chhetri chiah tluk loh a nei.

South Indian club inchhuanna ber chu an tlarhnung an ni a, match 18-ah goal 19 chiah an la chhuah–mah se Goa hi match 18-a goal 18 khungtu Ferran Corominas leh goal 12 khung tawh Manuel Lanzarote neitu an ni a, Jerry Lalrinzuala te tan hna a awlsam lo ang.