Khatla TBL-in BCA an hneh lêt ve ta March 15-ah Game 3 khelh a ni dawn
Zarkawt BCA chu Mizoram Super League Season linaah a vawi khat nan an chak lo a, an hneh loh chu H. Laldinsanga kaihhruai Khatla TBL an ni.
Ningani zana Hawla Indoor Stadium-a inkhel hi MSL4 semifinal game 2 a ni a, Khatla TBL-in 62-59 a hnehna an chan avangin game 3 khelh a ṭul dawn.
Final khel tur zawnna hi March 15 zanah neih a ni ang a, tualchhung basketball ngainaitute tan chuan 'Kût Pui' tiha chhal theih a ni ang.
Thutlukna vanga thutlukna
Game 1-ah TBL player Mapuia point luh chu ennawn a nih hnuah pawm sak a ni lo a, 73-67 in BCA an chak.
Mapuia chuan referee thutlukna hian inkhel result-ah nghawng a neih loh pawhin an khelh danah nghawng a neih thu Vanglaini a hrilh a, TBL coach hian game 3 a awm tur thu a sawi lawk bawk avangin referee thutlukna vang hian game 2-a first five a thlan dan a dan phah.
Game 1-a first quarter tawp lama lut MSL1 MVP Mapuia hian game 2-ah bul a ṭan a, Zarkawt BCA innghahna Zonunsanga chu mimal taka a ngam nghal avangin a tawpah nghawng a awm thei tih a lang nghal.
BCA an ṭha zawk
Court chhungah erawh MSL4 match ruk chhung la chak vek Zarkawt BCA an che ṭha nghal a, Khalta TBL chu a umtu zawkah an ṭang.
BCA-ah pawh che ṭha fal an awm lo; Lalrina Renthei, Henry Lalramngaihawma leh Dennis Lalmuanpuia te pawh an langsar thei lo a, veteran player Lalrinkima erawhin a la thiam reng tih a pholang.
Saron tlangval Kima hian point 11 neiin BCA tan Lalrina Renthlei (15 pts) dawta point nei tam ber a ni. Zarkawt club hian halftime-ah 20-30 in hma an hruai a, final an hnaih hman hle.
Ṭhazuala hun
Third quarter-ah Hollow BBSP aṭanga Khatla TBL zawmtu Vanlalṭhazuala chuan point 13 tehmeuh a khung a, Zarkawt dinhmun ṭha tawh chu pawh hniamin an awm.
Ṭhazuala hian game 2 bikah point 23 a lut a, third quarter zawhah 38-41 a an la hnufual avangin danglamna siamtu ni loin beiseina siamtu zawk a ni.
Danglamna Mapuia leh ChP-a
Second 39 chauh khelh tur a awm tawh tihin Zonuna'n point hnih pawimawh tak a nei a, BCA chuan 59-55 in hma an la hruai cheu. TBL-in time out an la a, Mapuia'n an thil tum a naute a hrilh ṭha a, a game plan hre chiang ber amah chu mawhphurtuah a awm zui.
Set play hmangin TBL-in BCA an ṭhiat a, Mapuia'n point hnih a neih bakah 3-point play a nei zui a. MSL1 MVP hian freethrow hi hlah mah se rebound an la a, Vanchuangpuia'n point hnihah chantirin 3-point play a neih chu point-ah a chantir leh a, second 23 la awm chuan TBL-in 60-59 in hma an hruai tawh.
Pressure sangah Zonuna leh R. Lalfakawma ten an lut lo a, Mapuia erawhin a freethrow hmuh pahnih chu lut lehin 62-59 a ni. Second kua la awmin Lalrina Renthlei-in 3 point luh a tum chu TBL player R. Lalmalsawma'n a foul angin lang mah se referee-in a ham lo.
Inkhelh hmaa Mapuia sawi a thleng dik a, game 2-ah Khatla TBL 62-59 a an chak avangin game 3 khelh a ṭul dawn.
TBL chakna Freethrow
Zarkawt BCA-in game 1-ah freethrow luh an harsat a, game 2-ah insiamṭhain vawi 21 a hmuh zinga vawi 13 an lut a, 61.90% a ni. MSL aṭanga chhut chuan Zarkawt hi an che chhe lo.
Amaherawhchu, TBL erawhin an freethrow vawi 20 aṭangin vawi 16 an lut a, 80% an lut. Hei hi a nep lo, basketball inelna ngaihhlut ber NBA season hnuhnung 72-ah pawh freethrow average chu 74.40% a ni pha chauh a, semifinal game 2-ah bik chuan MSL-a vawi hnih champion tawh TBL hian an khum a ni.