Tuikual South-in Mission Veng an 'BYE BYE'

Mizoram Super League Season linaah Tuikual South chuan final an lut ta. March 9 zan khan Hawla Indoor Stadium-ah TKS hian champion lai Mission Veng Vikings chu game 2-ah 68-55 in an hneh a, game 1-ah 60-59 a an hneh tawh bawk avangin game 3 khelh a ṭul ta lo.

MSL4 final chu March 20-ah khelh tur a ni a, Tuikual South khingpui tur zawnna game 3 chu March 15 zanah Khatla TBL leh Zarkawt BCA ten an khel ang.

TKS coach KC Lalliantluanga chuan, "Nikuma kan hneh loh la te mitthlaah a lo lang a, a lawmawm dan a dang hle a ni," tiin nikuma a rilru natna chuan kumina a lawmna a belhchhah thu a sawi.

Tuikual South mipui pawhin an lawm tih an chetziain an pholang a, Mission Veng mipui an 'bye bye' a, final an thlen avanga an lawm tluk zetin MSL3 semifinal-a an hneh loh te laka phuba an la hi an lawm.

Vikings an che ṭha hmasa
Tuikual South-in Lalfakzuala hmangin an lut nghal at a, Mission Veng cho phurtu zawk a ni. Vikings player Lalruatkima Sailo chuan quarter hmasa berah hian point 11 zet a lut a, 22-13 in champion lai hian hma an hruai a, an supporter-te an auh thiam bawk avangin final an hnaih hman hle.

Second quarter-ah pawh Zonunsanga leh Moses Zoremmawia bakah game siamtu ber Michael F. Lalawmpuia hoin Vikings-in an hmahruaina chu 17-30 ah an siam chho a, Mission Veng mipuiin nuam sain inkhel an en tawh.

TKS an rawn lang e
Amaherawhchu quarter hnihnaah hian Tuikual South tan Lalrinzuala Hnamte a rawn lang a, ani hi kum 2015-a mak tak maia Chawnpui Veng buatsaih veng inelnaa Khatla South champion ṭuma player pawimawh ni pha a ni.

Zuala Hnamte hoin TKS-in nunna thar an nei a, a zawn zata point 10 an neih chhungin

Vikings-in point an nei lo. Khatla South tlangval hian second quarter-ah ringawt point riat a rawn nei a, 27-30 ni hman mah se Michael F-a'n court a rawn rah leh hnuah Vikings che ṭha lehin 36-30 in chawlhlawk an hmang.

Third quarter-ah TKS tan Vanlalrinchhana leh F. Zodinthara te an rawn lang ve leh a, he quarter khar nan hian Dina hian 3-point a lut. Tuikual South tlangval hian inring tawk takin Mission Veng lam hawiin a ban a phar a, 49-45 a hma an hruai chiah avangin chak tur a hriat theih ṭan.

Quarter tawp berah Vikings captain Moses Zoremmawia'n 3-point lutin an inkar rawn tizim hret mah se TKS-in inrintawkna an ngah tawh a, minute khat aia tam khelh tur a la awm tihin an chak dawn tih an hriat avangin Tuikual South mipuiin an bye bye ṭan a, 68-55 in inkhel a tawp. Tuikual South mipuiin an chak an lawm lai hian Mission Veng mipuiin puitling takin a chak zawk lawmpui nan kut an lo beng.

Eng nge an sawi?
Tuikual South coach KC Lalliantluanga chuan, "Final thleng tur hian taksa leh rilru nasa taka kan inbuatsaih bakah kan hruaitute ruahmannain thlarau thlenga intuaitharna hun ṭha tak kan nei a. Kan rilru put hmang a dik tawh em em a, player leh coaching staff bakah club hruaitute zawng zawngin mahni in theihnghilhin team tan kan inpe vek mai hian kan team tan rah ṭha a chhuah mek niin ka hria," tiin team tana an ṭanrual thu a sawi a, anmahni ṭawiawmtu mipui chungah lawmthu a sawi bawk.

Mission Veng coach H. Lalhruaitluanga chuan, "Kan innghahna Mission Veng mipui te bakah veng hrang hrang aṭanga min tawiawm ṭhin tute, a bikin Chanmari leh Khatla a Vikings chhungkua te chungah lawmthu kan sawi a. Inkhelh zan apianga a thlawna bus min hmantir ṭhintu Pu Jeffrey L. Fanai, Mission Veng bakah club tana mi inphal, thilpek min petu te chungah lawmthu kan sawi tak meuh e," tiin lawmthu an sawi a, Tuikual South chu chak phu zawk an nih thu Vanglaini a hrilh bawk.

Vikings-in Ronald March an beisei a, American player an chah thleng thei lo a, an champion ṭuma player pawimawh Lalrina Renthlei-in Zarkawt BCA a zawm bawk avangin kum hmasa an pha lo a. Zarkawt Serpents aṭanga an lakluh Robert Lalfakzuala inhliam hnuah ngai an awh pha lo a, Vikings hi league round-ah pahnihna ni pha mah se semifinal-ah an lungawi a ṭul ta a ni.

Tuikual South 68-55 Mission Vikings
Tuikual South
Hming Pts RB Asst
Vanlalrinchhana 16 3 3
F. Zodinthara 12 7 1
Lalrinzuala Hnamte 12 5 0
Lalnunpuia Rentheli 11 8 8
Mission Vikings
Hming Pts RB Asst
Moses Zorema 14 10 2
Michael F-a 13 6 6
Lalruatkima Sailo 11 11 1
Zonunsanga 10 1 1

Semifinal Thlirna Tawi
Game 1-ah 60-59 in TKS an chak
Game 2-ah 68-55 in TKS an chak
TKS-in series 2-0 in an la
MSL4 final game 1 hi March 20-ah khelh a ni ang