Goa aiin Chennaiyin dinhmun a ṭha

Indian Super League semifinal-ah Chennaiyin FC chuan 1-1 in FC Goa an inhnehtawkpui a, goal khung zat inangah dinhmun ṭha zawk chu Chennai club an ni.

ISL season hmasa pathumah away goal rule hman ni lo mah se tun season aṭangin hman ṭan a ni a, khualmualah Chennaiyin-in goal an khung avangin draw result-ah South Indian club an lawm zawk.

FC Goa tan Manuel Lanzarote chuan goal hmahruai a khung a, Goan club-in chak beiseina thinlung nei hman mah se minute sarih liam hnuah Chennai club-in Anirudh Thapa hmangin an chhanglet a, inkhel entu 18,492 an reh ṭhap. Thawhlehni zanah second leg an khel leh ang.

J&J
Chennaiyin club tan Jeje Lalpekhlua leh Jerry Lalrinzuala ten inkhel bul an ṭan a, Mizo tlangval pahnihin goal khungna remchang an neih erawh an chhawr thei lo ve ve.

South Indian club hian minute riatna lekah Jeje hmangin goal hmahruai khungna remchang nei mah se Hnahthial tlangval hian a hun neih a chhawr thei lo. Chennaiyin-in minute 23-naah freekick an hmu a, a pet tura lo ding chhuak chu Jerry Lalrinzuala a ni.

Bethlehem tlangval hian senior player karah ṭha takin freekick pet mah se Goa goalkeeper Laxmikant Kattimani chet ṭhat

ṭum a ni a, Mizo tlangvalin a hun ṭha neih goal-ah a chantir thei lo. Jeje-a'n chawlhlawk hman hnuah hun ṭha a neih chhunzawm a, Hnahthial tlangval hian Mailson Alves hnen aṭanga a ball hmuh chu ṭha zeta la thlain goal-ah 'shot' mah se Kattimani bawkin ṭha takin a dan sak.

Inkhel thlirna
Goa khelmualah Chennaiyin an tlangnel zawk a, Jeje leh Jerry bakah Gregory Nelson-a'n chance ṭha tak a nei ve bawk. Goan club-in goal an khung piah lamah chance nei lo tawp erawh an ni bik lo a, Mandar Rao Dessai leh Ferran Corominas ten hun duhawm an nei ve ve.

FC Goa coach Sergio Lobera chuan inkhel thlirkirin, "Ball kan chanin kan khingpui tana hlauhawm turin kan tlanpui thei lo a, goal hmaah kan awm tam tawk lo. Mahse, vawiinah inkhel a la tawp lo a, final khel turin dinhmun ṭha zawk an awm lo," a ti.

Chennaiyin coach John Gregory chuan, "Kan hun ṭha neih zozai ka thlir a, 3-0 tala hnehna chang thei kan ni. Goa tan goalkeeper Kattimani kha a khel ṭha takzet a, draw result an hlawhchhuah theih avangin Goa khan an keeper chungah lawmthu sawi an ba a ni," tiin an khingpui keeper a fak.

Mimal Lawmman
FC Goa 1 - 1 Chennaiyin FC
Limitless Player Manuel Lanzarote, FC Goa
Winning Pass of the Match Gregory Nelson, Chennaiyin FC
Fittest Player Mandar Rao Dessai, FC Goa
Emerging Player Anirudh Thapa, Chennaiyin FC
Hero of the Match Gregory Nelson, Chennaiyin FC