Chanmarians hun a her chhuak

Mapuia Cricket League-ah match hnih ngawt a zawna an chak loh hnuin Chanmarians-in champion zia an chhuah ve leh ta a, Inrinni khan Suaka Cricket Ground-ah Kulikawn CC chu wicket sarih ngawtin an hneh.

Kulikawn tan innghahna Michael Lalremkima run hnih chiah siama a out nghal avangin beiseina a zuai hma a, captain Lalrinsanga (30 runs) tih loh run 30 vaw kai thei dang batsman awm loin over 20-ah run 100 chiah siamin wicket sarih an hloh.

Chanmarians-in bowling lama an chet ṭhat chu batting lamah pawh chhawm nungin over 13.5-ah wicket thum chiah hlohin an target an umpha a, run 37 siamtu Lalhmangaiha chu run siam hnem ber a ni.

Inrinnia inkhel dangah hneh loh la tawng lo Chhinga Veng leh Zarkawt Lords an inkhel bawk a, 3C-in run riatin hnehna an chang hram.

Lords-in vawm hmasak an thlan avangin Chhinga Veng an bat hmasa a, ball 29 leka run 35 vaw chhuak thei Saidul chet ṭhat zarzoin over 20-ah run 129 an siam a, wicket riat an hloh.

Zarkawt tan target huphurhawm tak niin lang lo mah se run an siam hma hauin captain Darremsanga leh Partha Pratim te an out nghal vangin Zahir Uddin (27) leh Saidingliana (35) te chet ṭhatin nghawng a nei thui thei lo - over 20-ah wicket kua hloh chungin an target hi run riatin an pha lo a, an tlawm.