UCL khelh tum Chelsea

Chelsea-in Inrinni zan khan Crystal Palace chu 2-1 in an hneh. Antonio Conte hote hian match 30-ah point 56 hmuin anmahni aia match khata khel tlem leh palinaa awm Tottenham Hotspur an phak lohna chu point hnih a ni.

Stamford Bridge-a inkhelah hian Blues tan Brazil winger Willian-a'n minute 25-naa a khung bakah Palace defender Martin Kelly chuan minute 32-naah an lamah a tilut bawk.

Tla thei dinhmuna ding Palace-in Patrick van Aanholt hmangin minute 90-naah an siphurh an sut ṭhen a, goal dang erawh a luh belh tawh lo. Match sarih chhung chak hmel hmu tawh lo Roy Hodgson hote hi table-ah 18-naah an awm mek.

Chelsea manager Anto-nio Conte chuan, "Chance ṭhahnem tak kan insiam a, hun tawpa kan lama goal an khung avangin talbuai deuh mah ila kan khel ṭha. Barcelona nena kan inkhel tur atan inpuahchahna ṭha tak a ni," tiin an khelh danah a lungawi.

London club hian league nomawi an humhim dawn lo a, season thara Champions League khelh phak tumin ṭan an la chho a, palina ni tur erawh chuan an chunga awm Tottenham an chetsual a la ngai. Conte hote hi UCL-ah an la dam a, Nilai zan hian Barcelona hmachhawn turin Nou Camp an tlawh ang.