Ronaldo goal hmangin Real an chak

Season ṭantira, "Cristiano Ronaldo a chuai tawh" tia sawitute chuan an ngaihtuahna an sen ṭhat a ṭul ang. Inrinni zan khan Real Madrid chuan khualmualah 2-1 in Eibar an hneh a, Ronaldo-a'n goal hnih a khung.

Real Madrid boss Zinedine Zidane chuan, "Khawvel dang aṭanga lokal ang mai a ni. Player ṭha tak a ni a, kan ta a ni bawk," tiin goal hnih khungtu a player a fak a, khawiahmah a chhuah loh tur thu a sawi tel bawk.

Inrinni zan inkhel dangah Barcelona chuan 2-0 in Malaga an hneh ve bawk a, a nupuiin an fa pathumna a hrin sak avanga inlan lo Lionel Messi tel loh zanah Catalan club tan Luis Suarez leh Philippe Coutinho te chuan goal khat ve ve an khung.

Hei le Ronaldo
Madrid tan Ronaldo-a'n minute 34-na lekah Luka Modric hnen aṭanga a ball ṭha hmuh chu goal hmahruai ni turin a khung a, Eibar tan Ivan Ramis-a'n an si phurh sut mah se hun tawp nan minute ruk chauh a awm tawh tihah Eibar tlarhnung an chesual. Dani Carvajal chuan remchangah lain Ronaldo tan a siamsak a, kum 33 mi forward tan goal-a chantir turin harsatna a awm lo.

Portuguese forward hian a match hnuhnung pasarih aṭangin goal 13 a khung a, La Liga match 22 aṭanga a goal khung zat chu 18 niin inelna hrang hrangah match 34 khelin goal 33 a khung - goal 35 khungtu Harry Kane chiah tun season-a goal khung tam lama a phak loh awmchhun a ni rih.

Zidane chuan, "Player danglam leh ṭha bik a ni a, a rilru puthmang a dik avangin zaninah pawh khan goal-a khung dawn tih a inhria a ni," tiin Ronaldo chu rilru huaisen tak pu mi a nih thu a sawi a, "A ṭhat zia in belhchian duh chuan a stats hi en mai ru," tiin a sawi tel bawk.

Bale a lo kir
Gareth Bale-a'n Champions League quarterfinal aṭanga Paris St-Germain an hnawhchhuah ṭumin starting XI a chang phak lo a, Real chhuahsan tur anga sawi thawm a awm reng bawk avangin Welsh forward boruakin titi a luah hle.

Mahse, Inrinni zana La Liga inkhelah erawh Bale hi inkhel bul ṭantir a ni a, a hun ṭha neih erawh a chhawr ṭangkai lo. Minute 90 chhungin Welsh forward hi a hmel hmuh tur a awm meuh lo a ni ber.

Chawlhlawk hman a nih hnuah Bale hian vawi khat chu ṭha zetin ball a tlanluhpui a, mahse a cross ṭha tak chu Ronaldo-a'n goal-ah a chantir thei lo.

Barca an hmuhnawm
Messi awm lo mah se league match 27 aṭanga goal 24 khungtu an thiampuipa tel lo pawhin Barcelona an ngaihtuahawm lo a, Malaga khelmualah minute 15-na lek aṭangin goal an khung ṭan.

Suarez chuan tun season-a a league goal 21-na ni turin Jordi Alba ball siamsak chu goal-ah a chantir a, minute 28-naah Coutinho-a'n goal nalh bik a khung chhunzawm ve bawk - Brazilian forward hian Ousmane Dembele hnen aṭanga a ball hmuh chu pen ruk vel lek aṭangin a kheng lut.

Minute 30-naah Samu Garcia chu Alba laka a foul avangin hnawhchhuah a ni a, Barca-in goal hnih an khung tawh bawk avangin chak tur a chiang hma hle. Catalan club hian Nilaini zanah Chelsea chu Champions League last 16-ah an mikhual ang.