Williams unau intawng dawn

Indian Wells Masters khelh laia hmeichhe singles-ah Williams unau an intawng dawn, Serena leh a u Venus te hi vawiin chawhma dar 10:30 hian last 16 lut zawk nih tumin an inkhel dawn a ni.

Thla 14 hnua rawn kir Serena hian Kiki Bertens chu 7-6 (7-5), 7-5 a henhin second round a paltlang a, awlsam takin hnehna a chang bik lo. Darkar khat leh minute 52 zet an inbeih hnuah a vannei zawkah a ṭang. Venus Williams chuan Sorana Cirstea lakah 6-3, 6-4 in hnehna a chang ve thung.

Williams unau hi tun hmain an intawng fo tawh, an inkhelh hnuhnung ber chu 2017 Australian Open final kha niin Serena hian hnehna a chang a, a vawi 23 nan Grand Slam nomawi a chawi.

Inkhel dangah Wimbledon champion Garbine Muguruza chu world number 100 Sachia Vickery lakah 6-2, 5-7, 1-6 in an chak lo. British number 1 Johanna Konta pawh kum 18 mi Marketa Vondrousova hmaah 7-6 (7-5), 6-4 in a tlawm bawk.

Player langsar pahnih an tlak laiin world number 1 Simona Halep, French Open champion Jelena Ostapenko leh seeded pakuana Petra Kvitova te chuan harsatna nei loin hnehna an chang thung.