Manolas-a'n Astori tan a goal a hlan

Fiorentina captain Davide Astori a thih thut avangin kar hmasa Pathianni zan Serie A inkhel tur zawng chu a hun sawn vek a ni a, Zirtawpni zan khan league hi khelh chhunzawm leh a ni.

Astori khelh tawhna AS Roma chuan Torino lakah 3-0 in hnehna an chang a, Roma goal hmahruai khungtu defender Kostas Manolas chuan 2014-15 season chhunga a lo khelhpui tawh Astori tan a goal khung hi a hlan.

Stadio Olimpico-ah Astori sunna hun hman a ni a, a tana hun an hman chhung hian club pahnih player-te chu an inkaihkuah vek. Fans lamin banner lian tawk tak siamin, "Kan hnena i awm ve kha a ropui" tiin an player hlui an thlahna thu an tarlang bawk.

Astori hi Ningani khan vui a ni a, vuina hmuna kal ve pakhat Daniele de Rossi chuan Torino lakah hian goal hnihna a khung, Italy international hian nikum May thla hnuah goal a khung ve leh chiah - an goal thumna hi Lorenzo Pellegrini khung a ni thung.

Champions league khelh zui tum Roma hian league table-ah an dinhmun an sawhnghet chho zel, match 28 an khelh tawhah point 56 hmuin pathumna an ni a, an hnuai chiaha awm Lazio aiin point liin an sang zawk.