Anfield-ah point khat hmu Chelsea an lawm

Inrinni zan khan Premier League champion rinkai Liverpool leh Chelsea an inkhel a, team pahnihin point khat ve vein an insem - inkhelh zawha lawm zawk chu Chelsea an ni.

Anfield thawm ring tak karah goal khung hmasa zawk chu Chelsea an ni a, Thomas Tuchel-a enkawl team tan Kai Havertz chuan minute 22-na lekah goal hmahruai a khung a, Anfield a reh vek.

Mahse, first half hun pek belha thil thlengin engkim a thlak danglam. Reece James-a'n Sadio Mane goal khung tur a kutin a dang a, referee-in video assitant referee hmanga a ennawn hnuah James a hnawt chhuak a, penalty a chawitir bawk.

Liverpool tan Mohamed Salah chuan harsatna nei loin penalty hi goal-ah a chantir a, mahse, minute 45 player tam zawk ni chunga an khel chungin Liverpool-in goal dang an khung thei lo.

Inkhel hmuhnawm
Anfield-a inkhelah Liverpool-in ball an chang tam zawk a, Tuchel-a'n Jurgen Klopp-a team a zuam sual theih tih hre ranin tlarhnung a rem uluk a, a tisual lo tih kan hmu bawk.

Liverpool-in ball an chang tam chungin tlarhnunga James, César Azpilicueta, Andreas Christensen, Antonio Rüdiger leh Marcos Alonso te inkawp an discipline a ṭha a, Anfield-a mipui puihna nen meuh pawh Reds-in an su hawng hleithei lo.

Chelsea-in an vuak letin an hlauhawm viau zel bawk a, minute 22-naah goal an hlawh chhuak ta nge nge - James-a corner aṭanga ball kal chu Havertz chuan ṭha zetin a tauh lut a, Liverpool keeper ṭha mi Alisson Becker tan dan ngaihna a awm miau loh avangin a lut.

Liverpool-in na taka vuak let nghal an tum a, mahse, tlarhmaa Sadio Mane, Mohamed Salah leh Roberto Firmino te inkawp an reh tlat a, Anfield-ah fan-ten lawmna tur an hmu hleithei lo - hliam vangin Firmino thlak a ngai zui.

Danglamna red card
First half hun pek belh a ni a, Chelsea goal-ah buai nuaih a awm. Mane 'shot' chu goal line aṭangin James chuan a kutin a lo dang a, referee-in a tirah hmu lo mah se VAR a inrawlh.

Referee Anthony Taylor-a'n video assistant-te thurawn duhtawk mai loin mual sirah thil thlen dan a en a, penalty spot a kawh bakah red card a phawrh tel - Chelsea an tlawm ngei dawn niin a lang.

Liverpool tan Salah chuan penalty hi goal-ah a chantir a, Chelsea goalkeeper Edouard Mendy chet dan mawi lo avangin buaina a chhuak zui a, a hma lawka dinhmun ṭha zawk Chelsea player-te an hlauthawng tih hai rual a ni lo.

Mahse, Blues an vannei - goal an chhuah hnu lawkah first half a tawp zui a, an team talbuai tur thlak danglam turin Tuchel-a'n hun a neih zui phah a, an talbuai tak tak hmaa chawlhlawk chu Chelsea tan himna a ni.

Tuchel a 'class'
Chelsea-in hliam vangin chawlhlawkah N'Golo Kanté an lakchhuah a ngai a, French midfielder aia lut tura Mateo Kovacic an la neih miau avangin mangan lutukna tur erawh niin a lang lo.

Tuchel-a'n team ṭha tak Liverpool lakah an tlem zawk tih a hrechiang a, 'risk' lak aiin him a thlang. Goal khungtu Havertz chu minute 45-naah la chhuakin defender tawnhriat nei ṭha leh hruaitu ṭha Thiago Silva a luhtir a, a tih fuhzia min hrilhtu chu inkhel result a ni.

Kum 37 mi defender hoin Chelsea tlarhnung an ding nghet tlat a, hun harsaah an chi ai lo a, an tih tur an hrechiang. Christensen lam hmaih theih a ni lo a, chutihrual chuan Mendy chuan fak a phu takzet.

Senegalese keeper hian shot 24 zet a hmachhawn a, heng zinga pasarih chu goal zawnah a kal - penalty tih loh chu a dang vek a, Chelsea fans tan lawmthu hrilh tlak a ni.

A êng zawngin...
Anfield-ah player pakhata tam zawk chungin Chelsea an hneh zo lo a, Liverpool tan a êng zawnga thil thlir a harsa mai thei. Mahse, Virgil van Dijk leh Joël Matip an en chuan season hmasaa an talbuai chhan an hmu ang.

Defender pahnih an inkawp leh theih tak avangin Liverpool tlarhnung nghing ṭhin kha a nghet leh ta viau a, a bik takin Dutch defender VVD-a'n fak a hlawh ṭhin hle.

Hetihrual hian Matip-a tha thawh theihnghilh loh a ṭha a, kum 30 mi centre back hi VVD nen an ding nghet a, anni pahnih inkawp hi eng team tan pawh sut hawn an harsa dawn. Chelsea lakah pawh an khel ṭha.

Pound maktaduai 97.5 man Romelu Lukaku hmuh tur awm leh zauh ṭhin mah se hun tam zawk chu reh takin hun a hmang a, player tlem zawk an nih hma pawhin Blues striker hi defender pahnihin an veng ṭha hle - second half-a a chance neih duhawm Matip-a'n a dante kha 'world class defending' a ni.

Klopp-a chesual
Premier League 'Big Six' an bazar suau suau laiin Liverpool-in Ibrahima Konaté an lakluh bak player lei belh an nei lo a, Reds-in pawisa an neih loh vang a ni pakhat a, an player neihsate hlawh tam zawka chelh an duh vang a ni bawk.

A chhan langsar tak pakhatah chuan Jurgen Klopp-a'n player mamawh belh loa a inhriat vang a ni. Chelsea lakah German coach hian thutlukna a siam sual em, tih chu zawhna awm thei tak zinga mi a ni tel.

Kum 18 mi Harvey Elliott chu a ring tawk tih lantirin inkhel boruak sangah bul a ṭantir a, khel ṭha pangngai mah se chance hlauhawm siam a nei meuh lo a, Thiago Alcántara khan bul ṭan zawk se inkhel a thlak danglam thei zawkin a rinawm.

Goal hnih khung tawh Jota aia Firmino bul ṭantir pawh a fuh chiah lo niin a lang a, Jordan Henderson-a'n Trent Alexander-Arnold ball thlawh duhawm lutuk goal-a a chantir lote kha Reds tan uiawm zingah a tel.

"Inkhel hmuhnawm tak a ni. Kum rei vak lo liam taah khan 2-1 emaw 2-0 emawin kan hneh a, chance awm lo aṭangin Mo Salah-a'n goal-a khung tih thleng pawhin ka la hria. Vawiinah erawh first half aṭang tawhin chance tam tak kan nei a, hun rei tak chhunga Chelsea team ṭha ber kan tum avangin chu chu thil lawmawm a ni. Chelsea hmachhawn hi chu a harsa reng ṭhin a, hei vang hian first half kan khelh danah ka lawm. Second half chungchangah chuan player 11 vs 10 a nih avanga inkhel awlsam tura ngai nghal ngawt ṭhin mi ka ni lo. Match maktaduai tam tak ka en tawh a, tam zawk nih hi chakna a ni kher lo. A bik takin Chelsea ang team ṭha, defending ṭha bawk tum chuan a ni lehzual a, a bik takin defending chiah an ngaihtuah tawh chuan a harsa lehzual a ni. Kha aia ṭha zawka khel tur kan ni tih chu ka pawm thlap a, mahse, season ṭantir chauh a la ni alawm. Goal khung kan tum a, kan theihna zawng zawng kan pe a, min nawr let changin kan inveng ṭha em em bawk. Chelsea kha tlarhnungah an nghet em a, an khelh dan an thlak hnuah a harsa lehzual a ni. Mahse, point hmu lo kan ni lo a, kan kal zel ang. Red card kha a pawi ka ti a, ka thusawi hi miin ngaithla se chuan game kalphung hi an thlak nasa tawh ngawt ang! Chelsea an khel ṭha a, point hmuh pawh an phu. Mahse, 11 vs 11 niin inkhel kha tawp se ka duh a, a ṭha zawk tak tak hriat nan pawh ka duh zawk a ni."
- Jurgen Klopp, Liverpool manager


"Referee thutlukna ka hrethiam a, sawisel ka tum lo. Chutihrual chuan thutlukna kha a siam hma hret em aw chu ka ti a, thutlukna ngai tho pawh siam dawn se kha aia rei zawk ngaihtuahna sen ngaihna tur chi niin ka hria. Ka team ten fak an phu a, Manchester City leh Anfield tluka player kim lo chunga khelh nana hmun harsa zawk ka hre lo. Minute tawp lamah pawh kan ṭang tlang thei a, ka team-te rang taka an insiamṭha thei te, an thawhhona ṭha em em maite kha fak loh theih loh a ni."
- Thomas Tuchel, Chelsea boss