Man City lakah Arsenal an pherh
Chak lo, goal khung lo, point la hmu lo, beiseina thamral mek leh a hniam ber a awm - Arsenal nihna an ni. Gunners hian kum 67 chhunga Premier League season bul an ṭan chhiat ber ṭum an tawng, zahna kawnah sawi tur nei loin an ding mek.
Inrinni zan inkhelah Manchester City chuan an mikhual Arsenal 5-0 in an sawp. Gunners midfielder Granit Xhaka hnawhchhuah a nih avangin hun chanve aia rei zawk chu kim loa an khelh a ngai, chutih rualin an kim lai pawhin goal hnih an chhuah hman.
Goal a sur
Etihad Stadium-a inkhelah goal kan hmu har lo, minute sarihna lekah midfielder Ilkay Gundogan-a'n amah aia sang Calum Chambers tauh phak loh a tauh lut, ball channa tur hmun thlan dik a pawimawh zia a zirtir chiang viau.
Mikel Arteta-a'n tlarhnungah duhthlan tur a nei lo - Rob Holding leh Sead Kolasinc inkawp kara ven loh striker Ferran Torres chuan hnai tak aṭangin a khung a, minute 12-na lekah goal hnih a luh nghal avangin inkhel resut a chiang der tawh.
Xhaka-a'n ṭul lo takin Joao Cancelo a tlawh tlu a, hnawhchhuah a ni. Chawlhlawk hmain striker khel ṭha tak Gabriel Jesus chuan an goal thumna a khung a, a siamsaktu chu Jack Grealish a ni - second half-ah Torres leh Rodri ten an kung ve leh bawk.
A boruak
Season bul an ṭan chhiat avangin Arsenal ṭantute an thinur a, Man City khelmuala inkhel entute pawh goal hnih an chhuah hnuah stadium aṭanga chhuak tau an tam - goal lina Rodri-a'n a khung lai phei chuan Gunners fans lamin kut bengin a lawmpui hial.
Raheem Sterling-a'n khung ngeina turah vawi hnih a hlah a, defender Aymeric Laporte leh Riyad Mahrez ten hun ṭha bik an hlah bawk - goal tam zawk an chhuah lo kha an vannei. Arsenal lamin 19% possession chauh ball changin goal khung tumin vawi khat chauh an pet!
Arsenal ṭantu a tawp thlenga inkhel en hram hram ten manager Mikal Arteta chu bang turin an au el a, club neitu duh lohna an lantir bawk. Gunners hi tun nipui bazara sum hmang hnem ber an nih avangin season bul ṭan chhiat lutuk hi fans tan a na zual ang.
A mak a na
Arsenal manager Arteta chuan, "Kan chak loh chauhin a ni lo, kan match khelh zawng zawngah hian ka mawhphurhna a ni. Thutlukna ka siam leh ka player-te finhmun hi ka chhut nawn ṭhin, tun aia ṭha zawk tur hi chu kan ni," tiin beidawng takin a sawi.
Man City manager Pep Guardiola chuan assistant atana a hman hlui hi a chhan a, hliam a ngah vanga buai an nih thu a sawi. Gunners hian an defender Ben White chu hri leng a kai avangin an la chhawr thei lo, midfielder pawimawh Thomas Partey pawh hliam vangin a la chawl mek.
Gunners captain Aubameyang chuan, "Man City lakah chuan huaisen taka khelh a ngai, mahse kan ti thei si lo. Arsenal kan nihna anga kan khelh chhuah leh hi a ngai a ni, a harsa pawh a ni mai thei, mahse kan tum tur a ni," tiin a sawi.
Man City an ṭha
Champion lai Manchetser City hian an duh ber Harry Kane an la thei lo a, Cristiano Ronaldo nen sawizawm an nih zuk hnuah an la lo bawk. Spanish manager Pep-a'n a neihsa a ringtawk a, striker Sergio Aguero chhuak mah se tlarhma lamah an buai rih lo.
Tottenham nen an inkhelh ṭumin goal an khung lo, a hnu match pahnihah erawh goal 10 zet an khung - tlarhmaah Jesus leh Torres te an hlauhawm a, inkhel chei mawitu Grealish leh Bernardo Silva te an hmuhnawm bawk; Kevin de Bruyne awm hunah an hlauhawm zual ang.
Guardiola chuan, "A tirah kan tlarhnung a nghet lo, vannei takin goal hnih kan khung a, a hnu lam chu a awlsam tawh. Inkhel ṭhenkhatah chuan goal khung a harsa, a chang erawh chuan vannei taka kan khung chang a awm," tiin an goal khung hnem a uan pui duh lo.