Man United-a Ronaldo kir dan chanchin kimchang

Zirtawpniah Juventus-in Cristiano Ronaldo chhuah tur thu an tichiang a, Manchester City nen an sawizawm a nih avangin he thuthang hi Manchester United ṭantute tan chuan mangchhia a tling.

Man United hian Ronaldo hi an ngaihlu a, English club chhuahsana Real Madrid leh Juventus tana a khelh hnuah pawh supporter ṭhahnem takin anmahni mi leh sa ang thlapah an ngai. Mumang lamah pawh an mitthla ngai loh, Ronaldo-a'n Man City jersey a ha tur chu pawm dam theih a ni lo.

A tawpah erawh thawnthu ziaktuin thiam taka a ziah ang maiin Ronaldo chu a ropuina ṭhin Manchester United tana khel leh turin Old Trafford-ah a kir a, khawvelin an ngaihven dan chu ropui tham tak a ni.

Juve nuam ti lo
Real Madrid chuan July 2018 khan an player pawimawh Cristiano Ronaldo chu Juventus-ah euro maktaduai 112 (£99.2m) in an hralh a, kum li daih contract a ziak.

Ronaldo hian season khatnaah Massimiliano Allegri hnuaiah a khel a, season hnihnaah Maurizio Sarri hnuaiah khel lehin league-ah goal 31 tehmeuh khung mah se Chelsea manager hlui hnuaiah hian a hlim lo.

Hetihlai hian Sir Alex Ferugson chuan Ole Gunnar Solskjaer hnenah Ronaldo la turin a lo nawr tawh. Season liam ta khan Juve hi Andrea Pirlo hnuaiah an khel a, league nomawi an chawi loh bakah Champions League-ah last 16 chauh an thlen avangin nasa takin an sawisel.

UCL chawipui lotu Ronaldo chu mawhphurhtuah an ngai a, a hlawh a tam bawk avangin club hruaitu hluiten na takin Portugal captain hi an mamawh loh thu an sawi chhuak.

Turin-ah Ronaldo a nghet lo a, a chhuah tur thu thuthang pawh a ri ring. Amaherawhchu amah berin club dang nena an sawizawm chu thuthang mai a nih thu a sawi avangin Turin-a cham turah a ngaih theih.

Hemi hma hian Juve chairman Andrea Agnelli chuan 'Juventus inghahna' a nih thu a sawi a, PSG nena sawizawm pawh a dik lo tih a tarlang tel tawh bawk.

Mahse maw...
A tak takah chuan thuthang tih hi a tak chu a ni ngei lawi si. Ronaldo hi Turin-ah a hlim loh avangin a agent Jorge Mendes chuan a chhuahna tur club a zawng a, Man United thuneitu lam chuan Juventus-in hralh an phal turah an ngai lo.

Nikum nipui khan Mendes hian PSG hi Ronaldo hi a lo zawrh tawh a, amaherawhchu French club hian Lionel Messi lak an tum avangin an uk-sak lo. Hei bakah hian Mendes leh club president Nasser Al-Khelaifi inkar boruak a ṭha lo a, tun nipuiah pawh Messi an lak theih avangin Paris-ah Ronaldo tan hmun a awm lo.

Real Madrid-in Kylian Mbappe an duh avangin defender pahnih Sergio Ramos leh Raphael Varane chhuah an pawi ti lo a, Santiago Bernabeu-a Ronaldo hruai kir tumna an nei lo.

Beiseina Man City
Ronaldo-a'n chhuahna tur a neih si loh avangin Manchester City chu a la thei tur ber an ni ta a, ni 10 liam ta kha chuan English club hian Harry Kane lak theih an la inrin avangin lak tumna an la nei lo. Spain lama thuthangah chuan Pep Guardiola-a'n Ronaldo a duh lo tih an ziak.

Amaherawhchu Kane-a'n Spurs-ah a cham tur thu a tichiang a, boruak a inthlak hlawk. Guardiola chu Ronaldo nen inbiain an sawi a, City-a a tel theih dan turte an sawi dun. Man City lahin Mendes-a player Ederson, Ruben Dias, Bernardo Silva leh Joao Cancelo te an kawl avangin thil theih loh kha thil theih a ni ta.

Kar liam ta Thawhṭanni aṭanga inbiakna ṭan chu Thawhlehniah chuan an thleng thui tawh hle. Paris-ah Mendes leh City aiawhte an inbia niin an sawi a, English club pawhin Ronaldo lalut thei ngei turah an inngai.

Ronaldo khelh dan leh City khelh dan a inrem em, a hlawh a tam avangin dressing room-ah buaina a awm phah ang em, tih zawhnate chu awm bawk mah se kar liam ta Thawhlehniah hi chuan Portugal hi Man City player ni ngei tura ngaih a ni.

Zirtawpni chhun dar 12:30 (IST) a Ronaldo-a'n Juventus-a a khelhpuite a va thlah liam pawhin Man City a zawm a inrin thu a sawi niin an tarlang. Chuvangin Ronaldo leh Man City hi an sawi zawm satliah lo a, thil tak tak a ni.

United an che rang
Manchester United lamin Ronaldo-a'n Man City a zawm hi an phal lo a, chak takin hma an la. Ole Gunnar Solskjaer chuan executive chairman Edward Woodward a bia a, Ronaldo la turin a ngen. Inbiak nan hun an hmang rei lo a, Woodward hian Juventus lam a be nghal.

Super League an buaipui laiin Woodward leh Juve chairman Andrea Agnelli te an inbe ṭha a, inremna nei turin hna harsa a awm lo. Heng zawng zawng phenah Sir Alex Ferguson, Darren Fletcher, Matt Judge, Rio Ferdinand, Patrice Evra leh Bruno Fernandes te an awm bawk.

Ferguson hian Ronaldo hi a duhsak hle. Kum 2005-a Ruud van Nistelrooy nen a pa thih laia an intih thiam loh pawhin Sir Alex hian kum 20 mi Ronaldo hi a chhan a, tun thlengin Portugal Captain hian Man United manager hlui hi a la zah hle.

Kar liam ta Ningani khan Ferguson hian United hruaitute biain, "Ronaldo lak letna hun ṭha bawlh pelh a nih chuan meidila thlarau sualte chhuah zalen an ni palh hlauh ang e," ti hialin a ṭawng chhuak niin an sawi. Ningani zanah Man United hian Ronaldo hi an be ta chiah reng a ni.

Man United neitu Glazers pawhin an hmelma laka club legend kaltir hi an remti lo a, theihtawp an chhuah. NFL lamah Glazers te club Tampa Bay Buccaneers chuan quarterback ropui Tom Brady lalutin nikum nipui khan Super Bowl-ah hnehna a chanpui. Ronaldo lakah pawh hian beiseina sang tak an nei a, Man United team chhung boruak a tih ṭhat theih an beisei a ni.

An mamawh em?
Ronaldo hi kum 36 mi a ni tawh a, nakkum February-ah kum 37 a ni dawn. Heti chung hian United-in Ronaldo hian danglamna a thlen theih an ring a, Edinson Cavani dinhmun vangin tlarhma player an mamawh tel bawk.

World Cup qualifier chu September, October leh November-ah khelh a ni dawn a, Cavani hi United tan innghahna tlak a ni dawn lo. French forward Anthony Martial lah Southampton lakah a chet ṭhat loh avangin rinrawl atan neih a har a dawn.

Hemi a nih avang hian Man United hian tlarhmaa player ṭha Ronaldo hi an mamawhah an inngai a, boruakah a ṭhat avangin Ole Gunnar Solskjaer-a'n a hman ṭangkai theih an ring a ni.